10 Apr 2019 10:18

inkhel

An sawi PUBG chu

Tun hnaia game lar ber pawl tia sawi theih, Player Unknown's Battle Ground (PUBG) chu thalaiin an buaipui hle a. He game hi 2017 khan khelh theihin an siam tan a, an tlangzarh atangin a lar chak hle a, tunah phei chuan kan ramah pawh boruak nei lian ber pawl a ni.

A hma chuan computer atanga khelh theih chauh a ni a, tunah chuan mobile phone atanga khelh theih PUBG Mobile a awm tawh a, hemi an siam atang phei chuan he game hmelhriattu hi an pung chak lehzual a ni. PUBG emaw, PUBG Mobile emaw chungchang tlem han tarlang ila.

A siamtu


Game khel thin chuan PUBG hi eng nge a nih tih chu an hre deuh vek a, mahse he game tan chhuaktu hi zawt ila, a tam zawk chuan an hriat a rinawm lo hle. He game siamtu hi Brendan Greene a ni a, amah hi Irish niin, game developer a ni.

Brendan Greene hi Ballyshannon, Ireland-ah 1976 khan a piang a, Ireland rama sipai camp pakhat Curragh Camp ah a seilian a. Fine Arts graduate niin, a zir chhuah hnu hian DJ leh photographer ang tein eizawnna bul a tan a, Sao Paulo lamah web designing lam a ti zui leh bawk a ni.

2013 khan game code lampang a bel chiang a, mi game siam sa te chu zir chiangin, hetiang lam hi a tuipui ta hle a. Game hrang hrang a khawih kual hnuah PUBG chu a siam zo thei a ni.

PUBG an tlangzarh hnuah a company din Bluehole Inc chu a hlutna a sang chak hle a, $4.6 billion vel zet niin, 2017 kumah a game siam chu copy maktaduai 13 vel zet an hralh nghal a. Tun dinhmunah Brendan Greene hlutna hi $200 million vel niin an chhut a ni.

PUBG phuah chhan

A hming hi mi tam tak chuan mak an ti a, nalh han tih em em tur a ni chiah lo bawk a. Game siamtu Brendan Greene hi game khel nasa thei deuh mai a ni a, a hming lemah Player Unknown tih a hmang thin a, hemi changchawi hian a game siam thar pawh hi Player Unknown’s Battle Ground tih a phuah a ni.

World record siamtu
PUBG chu khawvela game siam chhuah zingah a ruala kheltu nei hnem ber a ni a. December 2017 khan he game hi ni khatah mi 31,06,358 in an khel a, hetiang zat hian game dang chu a rualin an la khel ngai lo a ni.

‘Winner Winner Chicken Dinner’


He tawngkam ber kher hi a game nen a inhmeh lo viau mai a, mahse an hmang miau sia. 1930 chho velah khan ram dinhmun tlakchhiat vangin ei leh in a harsa hle a, mi tam tak chuan inthap an uar hle bawk a. An inthapnaah hian an chak a nih chuan zanriah atan ar sa te an hlawh ve thei thin a, hei hi he tawngkam rawn tan chhuahna niin an sawi a ni.

‘Erangel’ hming put chhan
He hming hi a tak taka awm miah lo a ni a, mahse phuah chhan tha tak a awm thung a. Brendan Greene hian fanu Eryn a nei a, a fanu hming leh Angel tih chu la kawpin Erangel tih hi a piang chhuak a ni.

‘Pochinki’ hi a takah a awm


Erangel map hmehriattute chuan Pochinki hi an hre bel hle tura ngaih a ni. Game-ah chauh lo pawh he hmun hi a awm tak tak a, Russia ram hmun eng emaw zatah Pochinki tih hi a awm a ni.