An ramah pawh Joshua ka cho - Wilder

08th November 2017, 09:11PM

WBC heavyweight champion Deontay Wilder chuan Anthony Joshua a bei chhunzawm zel a, Britain boxer hi Great Britain ngeiah pawh a hmachhawn ngam tih a sawi.

Kum 32 mi Wilder hian Inrinni liamta khan a kawnghren humhimin Bermane Stiverne an knockout a, Joshua pawh hian tunhnaiah Carlos Takam hnehin WBA leh IBF kawnghren a kawllai a humhim ve bawk.

BBC Sport hnenah Wilder chuan, "Stadium khat tlat a mipui pungkhawm hi a ropui a, mahse sum tamna leh Boxing hmunpui (Mecca of boxing) chu America a ni thung."

"Mahse hmeichhe naupang ang maiin mahni inlum a tawm a duh chuan Lal hian knockout turin a pan thei a, harsatna a nei lo." tiin a țawng huai hle.

BBC Radio 5 live Breakfast-in an kawmnaah Wilder hian boxing promoter Eddie Hearn pawh a bei a, Hearn hian British fan-te thluak suin Joshua chu khawvela heavyweight boxer țha ber angin a chhuah tiin a sawi.

Sawi chhunzawmin Wilder chuan, "Joshua hi champion diktak anih chuan England ami ho hian in bei tura in nawr a ngai a, a țha ber in hmuh hi a ngai."

"Ka thinlungah chuan keimah hi a țha ber ka ni a, ka nilo a nih chuan tuemawin min hmuhtir a țul." tiin a sawi.

American boxer Wilder hian professional boxing a luhchilh hnuah bout 39 khelin vawi 38-ah a tumpuite a knockout thei a, kum 2008 khan Olympic Games-ah Bronze Medal ala tawh bawk a ni.

Copyright © inkhel.com 2024. All rights reserved.