Chelsea chuan tun season-a an Premier League game hnihna an khela, team hnihte hian goal khat ve ve thunin an inhnehtawka, point khat ve ve an hlawhchhuak.
Chelsea hian an khung hmasaa, an academy player Mason Mount chuan Chelsea tan thunin, Leicester tan Wilfred Ndidi chuan a khung ve bawk.
Chelsea hian game hnihah point khat chiah an la hlawhchhuaka, Leicester hian game hnihah point hnih an hlawhchhuak ve tawh thung. Chelsea hi 15-naah awmin Foxes hi 12-naah an awm.
Chelsea manager thar Frank Lampard chuan manager angin a vawi khat nan Stamford Bridge-ah game a nei a, home-a a game hmasa berah Lampard hi a chak zo lo. Lampard hian Chelsea hi game thum a khelhpui tawh a, vawi hnih tlawmin vawi khat an tumpuite an inhnehtawkpui a ni.
Chelsea 1-1 Leicester City
(Mount 7’) (Ndidi 67’)
Player Ratings
Chelsea: Kepa 6, Azpilicueta 7, Christensen 5, Zouma 6, Emerson 7, Kante 7, Jorginho 6, Mount 7, Pedro 7, Pulisic 6, Giroud 8. Subs: Abraham 5, Willian 5, Kovacic 5.
Leicester: Schmeichel 6, Pereira 6, Evans 7, Soyuncu 6, Fuchs 7, Ndidi 5, Tielemans 6, Choudhury 5, Maddison 7, Perez 6, Vardy 5. Subs: Praet 6, Albrighton 6.
Match Report
Chelsea hian inkhel bul an tan tha a, a tir lamah inkhel thununin minute hnih vel khelh a nihin Chelsea hian a zawnin chance tha em em an nei nghala, Mount-a shot chu Kasper Schmeichel chuan lo save in, a save per hi Pulisic chuan goal-ah khung tum ve leh nghal mahse Schmeichel chuan a lo save leh.
Minute sarihnaah Chelsea hian goal an khung nghala, an box pawn deuh lawkah Ndidi chu Mount chuan ball a chhuhsaka, Mount hian rem leh rem lovin goal-ah a pet luta, Chelsea hma a hruaipui.
A tir lama inkhel an thunun bak chu Chelsea hi an khel tha lutuk lova, Manchester United leh Liverpool an tum aiin an khel chhe daih. Darkar chanve khelh a nih hma deuhin Chelsea fullback Emerson chuan veilam atang ball a cross luta, Olivier Giroud chuan lo khengin Kante a pe a, Kante hian goal-ah pet zui mahse Leicester left-back Fuchs chuan a lo block sak.
Second half-ah Leicester an khel tha hle a, chance pawh an nei zing malh malh. Foxes tan hian kum 22 mi James Maddison a tal na hle a, Chelsea lamin an chai hleithei lo a ni ber. Leicester hian chance an nei zinga, Chelsea erawh an goal bawh a na lo hle.
70mins khelh a nih hma hretin Leicester hian goal an khung ta nge nge a, Maddison-a’n corner atanga ball a vawrh luh chu Ndidi chuan Chelsea defender pahnih inkar atangin chiang em em in goal-ah a tauh luta, Leicester si phurh a sut.
Leicester hian chance tha tak an nei zui zela, Chelsea lam pawhin chance nei ve thin bawk mahse Foxes hi an hlauhawm zawk a tih theih. An si phurh an rulh hnuah Maddison a tal na telh telh emaw tih tur a ni a, chance tha tak tak nei mahse goal-ah a chantir thei lo. Inkhelhah goal hnih chiah a luta, Chelsea hian second half-ah goal khat chiah an chhuah hi an vannei hle a tih theiha, 1-1 in inkhel hi a tawp a ni.