An mikhual Crystal Palace lakah Arsenal an tlawm

22nd April 2019, 03:04AM

Arsenal chuan Emirates Stadium-ah Crystal Palace an mikhual a, mikhual team hi goal thun hnem zawkah an tang a, 3-2 in an chak.

Mual neitu Arsenal chuan Premier League club chungnung pali zinga tel theih ngei an tum hle a, Crystal Palace nen an inkhelh hma hian inelna hrang hranga an game hnuhnung pasarihah vawi ruk an chak a, vawi khat chiah an tlawm a. Emirates Stadium bikah phei hi chuan tun hnaiah an che tha chho hle a, league game 10-ah an chak tawh a ni.

Mikhual team Crystal Palace chu che tha chho tak an ni chiah lo a, an game hnuhnung pariatah chak leh tlawm an fawm tawn a ni ber a, an khelh hnuhnun berin Manchester City chuan 3-1 in an hneh a ni.

Unai Emery chuan Europa Leauge quarter final-a Napoli an hneh tuma a khelhtir pasarih chu a thlak danglam a. Bernd Leno chu bul a tantir a, Laurent Koscielny, Sead Kolasinac, Alexandre Lacazette leh Pierre-Emerick Aubameyang te chu a khelh nawntir hlawm a, Mesut Ozil pawhin bul a tan ve a ni.

Roy Hodgson chuan kar hmasaa an tlawm tuma a khelhtir pathum chu a thlak danglam a, Joel Ward, Max Meyer leh Cheikhou Kouyate te chu bul a tantir a. Patrick van Aanholt leh Andros Townsend te chu substitute bench lamah an awm a, Jeffrey Schlupp chu inhliam vangin a tel thei lo a ni.

Arsenal (3-4-1-2): Bernd Leno; Shkodran Mustafi, Laurent Koscielny, Konstantinos Mavropanos; Carl Jenkinson, Matteo Guendouzi, Mohamed Elneny, Sead Kolasinac; Mesut Ozil; Alexandre Lacazette, Pierre-Emerick Aubameyang

Subs: Petr Cech, Lucas Torreira, Alex Iwobi, Henrikh Mkhitaryan, Eddie Nketiah, Ainsley Maitland-Niles, Nacho Monreal

Crystal Palace (4-5-1): Vicente Guaita; Joel Ward, Martin Kelly, Scott Dann, Aaron Wan-Bissaka; Max Meyer, James McArthur, Luka Milivojevic, Cheikhou Kouyate, Wilfried Zaha; Christian Benteke

Subs: Wayne Hennessey, Jordan Ayew, Bakary Sako, Michy Batshuayi, Jairo Riedewald, Andros Townsend, Patrick van Aanholt

Inkhel an tan a, Arsenal chuan bul an tan tha thawkhat a, mahse a hnu deuh atangin Crystal Palace chu an che fuh chho leh deuh a. A tir lam atangin team pahnihte hian goal thun theihna hun tha an nei dun zeuh zeuh a, mahse an tum angin thil a awm thei mai lo.

Minute 17-ah goal a lut a, mikhual team zawkin hma an hruai tlat mai a. Crystal Palace chuan a ding lamah free kick an hlawh a, hei hi Luka Milivojevic chuan petin, heta ball kal hi six-yard box chhunga vengtu nei lo Christian Benteke chuan Arsenal goal-ah chuan a lo tauh lut a ni.

April 2018 khan Christian Benteke hian Leicester City lakah goal a thun a, chumi hnua club goal a thun leh hmasak ber niin, Arsenal laka a thun hma hian game 19 khelhah goal shot 25 neiin, ni 358 chhung chu goal hi a thun tawh lo a ni.

Si an phur chiah a, Arsenal chuan an si phurh chu sut tumin beihpui an thlak nghal a. Crystal Palace chu bet viau mahse goal a luh belh thei ta mai lo a. Minute 38-ah Aaron Wan-Bissaka chuan Palace box chhungah ball chu a kutin a tifuh ngei niin a hriat a, Arsenal chuan penalty hlawh an inbeisei viau a, mahse referee chuan corner a hlawhtir ta zawk a ni.

Half time thlengin goal a luh belh thei ta lo a, mikhual team zawk chuan 1-0 in hma an la hruai chhunzawm zel a ni.

Second half an tan leh a, Unai Emery chuan mi pahnih a thlak nghal a, Konstantinos Mavropanos aiah Alex Iwobi chu a luhtir a, Carl Jenkinson chu la chhuakin Ainsley Maitland-Niles chu a luhtir bawk a ni.

Rei pawh an khel hman lo, goal a lut nghal der mai a. Substitute Iwobi chu goal luh theihna atan a tangkai nghal a, a sir lamah ball a tlanpui a, hei hi box lamah chuan a pet phei a. Alexandre Lacazette chuan lo lain, vengtu nei lo Mesut Ozil chu a pe a. Ozil hian ball chu chep deuh atangin Crystal Palace goal-ah chuan a lo thun a, Arsenal si phurh chu a sut nghal a ni.

Emery game thlak danglam a hriat a, substitute pahnih Iwobi leh Maitland-Niles te chuan Palace defender te an chawk buai hneh hle a. Arsenal game pawh first half nen an inang tawh lo hle a, ball an inpe rang tawh a, Palace chuan ball an chang tam thei lo hle.

Minute 61-ah Palace chuan free kick an hlawh a, heta ball kal hi Wilfried Zaha chuan lain Mustafi chuan lo dan tum mahse Arsenal goal-ah chuan a thun a, mikhual team chu 2-1 in hma a hruaipui a ni.

Hma an hruai leh takah chuan Palace game a danglam nghal vek a, inkhel pawh an thunun chho a. Rei pawh an khelh chhunzawm hman lo, goal dang an thun belh leh nghal a ni.

Minute 69-ah corner an hlawh a, Luka Milivojevic chuan hei hi a pet a, ball kal chu James McArthur chuan lo thunin, Arsenal chuan offside niin puh mahse referee chuan goal-ah a pawm a, Crystal Palace chuan 3-1 in hma an hruai a ni.

Arsenal chuan point hlawh chhuah ngei tumin theihtawp an chhuah a, an nawr na viau mai a. Minute 77-ah Pierre-Emerick Aubameyang chuan dinglam sir atangin ball lain Palace defender pathum a paltlang a. Alexandre Lacazette chu ball pek a tum a, mahse Kelly a per a, amah bawk chuan ball chu a chang leh a. Ball hi Palace goal hnuai kilah thunin Arsenal si phurh pakhat chu a sut a ni.

Mual neitute chuan hun tawp thlengin theihtawp chhuah mahse goal an thun belh thei ta chuang lo a, Crystal Palace chu 3-2 in an chak ta a ni.

Copyright © inkhel.com 2024. All rights reserved.