11 Sep 2019 07:09

inkhel

An khuaah Zlatan-a lim an tlangzarh dawn

Zlatan Ibrahimovic chu an ramah an chawimawi dawn a, kumin October thlaah hian a chenna khua Malmo-ah a lim lian tak mai an tlangzarh dawn.

LA Galaxy captain hian 1999 khan an khaw club Malmo FF ah bul a tan a, hemi hnuah hian kum 20 chhung zet chu professional football huangah hian a lo tal ve tawh a. Khawvel huapa striker tha berte zinga sawi tel a ni chho thei hial a ni.

Amah chawimawina atana a lim an siam hi metre 2.7 (feet 8.8) a sang niin, dar hmanga siam a ni a, kg 500 vel zeta rit a ni a. He lim hi Swedish Football Association (SFA) in Ibrahimovic an pek ve liau liau a ni a, Malmo stadium hlui leh thar inkarah an dah a, October 8 hian an tlangzarh ang.

Hakan Sjostrand, secretary general, Swedish Football Association (SFA) chuan, “He lim hi Sweden ram mai ni lo, khawvel pum huapa footballer tha berte zinga mi hriat rengna atana tih a ni,” tiin a sawi.

Ibrahimovic chuan, “Kan khua Malmo-ah ngei mai ka lim an dah tur hi lawmawm ka ti hle a, a tir atang khan hei hi ka duhthusam a ni a. Helai hmun hi thil engkim intanna a ni a, helai hi ka thinlunga hmun tla na ber a ni,” a ti.

“A tira hetiang an ti dawn tih ka hriat khan mak ka ti a, awih harsa pawh ka ti hle a. Mi tam tak phei chuan ka lim ber kher an siam hi mak an tiin, tul an ti lo viau maithei a. Amaherawhchu, kum 15 chuang zet mai kan ram team-ah theihtawp chhuahin ka lo khel ve tawh a, hei bakah hian club-ah kum 20 ka lo tal ve tawh bawk a, hei hi min hriatpui ve a ni ber mai,” a ti bawk.

A sawi zelnaah, “A tlangpuiin hetiang thil hi chu an thih hnuah an ti deuh chawk a, kei chuan ka dam lai ngeiin ka tawng hman a. Ka thih hnuah pawh hei hi chu kumkhuain a awm zui dawn a ni,” a ti.

Swedish striker hian Europe khawmualpuia club lian eng emaw zatah a khel kual tawh a, Ajax, Juventus, Inter Milan, Barcelona, AC Milan, Paris Saint-Germain leh Manchester United ah te khel tawhin, hengah hian goal 400 chuang a thun a, league leh cup title thahnem tak a lo la tawh bawk a ni.

Euro 2016 zawhah khan ram tana khelh chu a chawlhsan zui a, Sweden tan game 116 a khel hman a, hengah hian goal 62 chu a thun hman a ni.