Arsenal chuan Emirates Stadium-ah Burnley an lo mikhual a, mual neitute hi tun season-a an khelmuala an inkhelh hmasak berah 2-1 in an chak.
Burnley hian tun season bul tannaah Southampton chu 3-0 in an hneh a, Premier League game an khelh hnuhnun vawi ngaah vawi khat an chakna chiah a ni a. Tun tumah hian an hmaa dingte chu a hmaa mite nen chuan an inang vak dawn lo hle a, a zawna vawi 10 an lo hneh loh tawhte an ni.
Arsenal chuan season bul tan nan Newcastle United chu 1-0 in an hneh thei a, kumin April thlaa Watford an hneh hnua a vawi khatna atan an goal an venghim ve thei a. An mikhualte chu an tan chuan hlauhawm taka ngaih a ni hran lo hle.
Premier League bikah chuan tun tuma an inkhelh hma hian Arsenal chu anni pahnih inkhelh hnuhnun vawi 9 ah an chak vek a. Team pakhat laka an chak tluan rei zualte chu 1994 leh 2004 inkara Manchester City laka a zawna vawi 11 an chak leh 2012 leh 2017 inkara Newcastle United laka a zawna vawi 10 an chakte a ni.
Mikhual team tan Southampton an hneh tuma bul tantute vek khan bul an tan leh a. Matthew Lowton, James Tarkowski, Ben Mee leh Erik Pieters te chu tlar hnungah an ding a, tlar hmaah Chris Wood leh Ashley Barnes te chu an ding bawk a ni.
Mual neitu lam chuan Newcastle an hneh tuma khel pathum an thlak danglam a, tlar hnungah Callum Chambers aiin an player thar David Luiz chuan bul a tan a, Real Madrid atanga midfielder an hawh Dani Ceballos chuan Granit Xhaka a thlak bawk a. Tlar hmaah Mkhitaryan aiin Lacazette chuan bul a tan a, Mesut Ozil a la tel loh avangin player la naupang tak Joe Willock pawhin bul a tan leh bawk a ni.
Arsenal (4-2-3-1): Bernd Leno; Nacho Monreal, Sokratis, David Luiz, Ainsley Maitland-Niles; Matteo Guendouzi, Dani Ceballos; Pierre-Emerick Aubameyang, Joe Willock, Reiss Nelson; Alexandre Lacazette
Subs: Emiliano Martinez, Lucas Torreira, Nicolas Pepe, Gabriel Martinelli, Calum Chambers, Sead Kolasinac, Henrikh Mkhitaryan
Burnley (4-4-2): Nick Pope; Matthew Lowton, James Tarkowski, Ben Mee, Erik Pieters; Johann Gudmundsson, Jack Cork, Ashley Westwood, Dwight McNeil; Chris Wood, Ashley Barnes
Subs: Jeff Hendrick, Aaron Lennon, Phil Bardsley, Charlie Taylor, Ben Gibson, Joe Hart, Jay Rodriguez
Emirates Stadium-ah inkhel an tan a, a tir atangin team pahnihte chu an innawr nghal a. Mual neitu zawk Arsenal chu inkhelh tirh atang hian an chungnung nghal zawk a, ball pawh an chang tam zawk daih a ni.
Rei vak pawh an inkhel hman lo, goal a lut nghal a. Minute 13-ah Arsenal chuan corner an hlawh a, hei hi Ceballos chuan a pet a. French striker Alexandre Lacazette chuan ball kal phei chu lain, Mee leh Pieters te lakah ball chu a veng thei a, hemi hnuah hian Burnely goalkeeper kap karah a pet phei a, Arsenal chu 1-0 in hma a hruaipui nghal der a ni.
Arsenal khelmualah hian Arsenal leh Burnley te hi vawi 7 an lo inkhel tawh a, hengah hian Gunners chu an la chak vek a. Arsenal hian goal 21 chu an thun tawh a, an lamah goal 4 chiah an la chhuah thung a. Arsenal hian 2006-07 hnuah anmahni khelmuala an lo hneh ngun ber chu Stoke City niin, vawi 10 an inkhelhah vawi 10 an chak a ni.
An khelh chhunzawm leh a, goal a luh belh thei mai tawh lo a. Half time thlen hma hretin mikhual team lamin goal an thun ve hlauh mai.
Minute 43-ah Dwight McNeil chuan Arsenal goal lamah ball chu a pet a, hei hi Matteo Guendouzi chuan penalty area-ah a lo dang a. Ball per chu vengtu nei lo Ashley Barnes hmaah a kal a, Barnes hian awlsam zetin Bernd Leno man theih lohin goal-ah chuan a lo thun a, an si phurh chu a sut a, tun season chhungin goal thum a thun tling ta chiah a ni.
Burnley-in goal an thun hnu lawkah hian Arsenal chuan goal an thun zui ve leh zat a, mahse offside vangin an pawmsak ta lo a. Chawlhlawk a thlenin team pahnihte hian goal khat ve ve an thun a, 1-1 a ni.
Second half an tan leh a, tan phat atangin team pahnihte chu an innawr chhunzawm leh nghal a. Goal thun hmasa zawk nih inchuhin an khel chho a, an thil tum erawh an thlentir thei mai lo ve ve thung.
Minute 64-ah mual neitu tan lawmna hun a inher chhuak a, Arsenal goal hmahruai siamtu bawk Dani Ceballos chuan Johann Gudmundsson chu ball a laksak a, hei hi Pierre-Emerick Aubameyang chu a pe a. Gabon striker hian Burnley goal veilam hnuai kilah a pet lut a, Arsenal chu 2-1 in hma a hruaipui a ni.
Dani Ceballos hi Arsenal player ni tawh zingah chuan Premier League game khelh tirha mi goal thun tur vawi hnih siamsak nghal thei pathumna niin, a hmain Ray Parlour leh Henrikh Mkhitaryan te chuan an lo ti tawh bawk a ni.
A umtu zawk an nih leh tak hnuah hian Burnley chuan an si phurh chu sut tumin beihpui an thlak ve leh a, mahse Arsenal tlar hnung chu an pal tlang thei lo hle a. Hun tawp thlengin khawi lam mah hian goal an thun belh tawh lo a, a tawpah Arsenal chu 2-1 in an chak ta a ni.
Kar lehah khian Arsenal chuan hmabak hautak zet mai an nei dawn a, Anfield-ah Liverpool nen an inhmachhawn dawn a ni.