20 Nov 2020 04:26

inkhel

An khelmuala United chak theih loh vangin Tuanzebe a hrilhhai

Axel Tuanzebe chuan anmahni khelmuala Manchester United an chak thei lo lutuk chu mak a tih thu a sawi.

Manchester United chu kumin July thla hnuah khan anmahni khelmual Old Trafford-ah an chak thei reng reng lo mai a. An khelmuala chak hmel an hmuh hnuhnun ber chu July 4 kha niin, division hniam lama tla tur Bournemouth chu 5-2 in an hneh a ni.

Bournemouth an hneh hnuah hian vawi 6 chu mikhual an dawng leh tawh a, hengah hian chak hmel an hmu thei ta miah lo a, Ole Gunnar Solskjaer chuan chak theih dan tur a la ngaihtuah chhuak leh chiah lo a ni ber mai.

Match 6 chhung Old Trafford-a an chak theih loh zingah hian season hman zawh takah khan match 2 an khel hman a, a dang zawng match 4 chu tun season kal mekah hian a ni.

Tun season kal mekah Crystal Palace, Tottenham Hotspur leh Arsenal te chuan Old Trafford-ah hian point 3 an hmu thei a, Chelsea chu mual neitute nen goal thun loin an inhnehtawk a, point 1 an hawn ve bawk a ni.

United defender Axel Tuanzebe chuan anmahni khelmuala an chak thei tlat lo mai chu mak a tih thu a sawi a, chak hmel an hmuh ve theih tawh nan theihtawp chhuah tul a tih thu a sawi chhuak.

Tuanzebe chuan, “Eng vanga kan khelmuala chak thei lo nge kan nih tih hi ka hre bik lo a, a chhan bulpui ber sawi tur ka hre bik tlat lo. Pangngai taka kan khelh theih a pawimawh a, hmun danga kan khel ang bawka khelh a tul niin ka hria,” a ti.

“Kan club tantute leh kan inkhel lo entute ang bawkin keini pawhin mak kan ti ve tho a. Kan awm dan hi kan thlak danglam chu a ngai hle a ni,” a ti bawk.

Kum 23 mi Tuanzebe chuan an inkhelha mi 70,000 vel zet entu awm thin an awm tak loh chuan boruak a ti danglam hle tih sawiin, hei hi an chak theih lohna chhan pakhat chu nia a hriat thu a sawi a ni.