Premier League inkhelah champion fel tawh Liverpool chuan Anfield-ah tlak hlauhawma awm Aston Villa an lo mikhuala, Liverpool hian si hnih faiin an mikhual hi an lo hneh.

Liverpool tan hian Sadio Mane leh an rawlthar contract thar ziak zo hlim Curtis Jones-te chuan goal an khunga, an champion hnuah Liverpool hian game hnih khel tawhin a hmasa zawkah Manchester City lakah mualpho mahse a game hnihnaah erawh an chak.

Khelh 33-ah Liverpool hian 89 an hlawhchhuak tawha, Villa hian khelh 33-ah point 27 hlawhchhuak tawhin, 18-naah an awm meka, an dinhmun a tha lo hle.

Liverpool hi an khel tha hran lova, Villa lakah an hlauhawm tawk lo hle. First half-ah goal lut a awm lova, Villa si ban nghaktu hi Liverpool goalkeeper hlui Pepe Reina niin, Liverpool hian an tibuai khat hle.

Liverpool hian 70mins khelh a nih thlengin shot on target vawi khat chiah an neia, first half-ah shot vawi hnih bak nei lo mahse an shot on target neih vawi hnihnaah goal an khung.

70mins khelh a nihin Mane chuan Liverpool hmahruaina goal a khunga, tun season-a a goal 20 thunna a ni. Hun tawp dawnah bench atanga rawn lut kum 19 mi Jones chuan Liverpool goal hnihna khungin, 2-0 in inkhel a tawp ta a ni.

Liverpool 2-0 Aston Villa

(Mane 71’, Jones 89’)

Player Ratings

LIVERPOOL: Alisson 7, Alexander-Arnold 6, Gomez 6, Van Dijk 6, Robertson 6, Keita 6, Fabinho 6, Oxlade-Chamberlain 5, Salah 7, Origi 5, Mane 7. Subs: Wijnaldum 6, Firmino 7, Henderson 7, Jones 7, Williams n/a.

ASTON VILLA: Reina 7, Konsa 7, Hause 7, Mings 7, Taylor 7, McGinn 7, Douglas Luiz 7, Grealish 7, Trezeguet 6, El Ghazi 7, Davis 6. Subs: Samatta 6, Jota 6, Vassilev 5.