17 Jul 2019 05:19

inkhel

Amir Khan te hian dawt an sawi: Pacquiao te team

Manny Pacquiao te chuan Amir Khan te thil sawi chhuah chu thu rintlak loh tak, belh chian dawl lo a nih thu an sawi.

Nimin lamah Amir Khan chuan kumin kum tawp lamah Manny Pacquiao nen an inhnek dawn tih thu sawiin, anni pahnih an inhnek theih nan hian thil tih fel ngai pawh an tifel deuh vek tawh niin a sawi a. Hei hi Pacquiao thupuangtu chuan a pha nghal vat a, dawt mai a nih thu a sawi chhuak.

Kumin July 13 khan British boxer Amir Khan chuan Jeddah, Saudi Arabia-ah Billy Dib a hneh a, WBC international welterweight title a la a. Thawhlehni khan Pacquiao nen inhnek turin inremna an siam fel tawh tih thu a sawi a, November 8 khian Riyadh, Saudi Arabia-ah an inhnek dawn niin a sawi a ni.

Briton boxer hian British media hmaah Pacman chungchang hi sawiin, tun kar Inrinniah hian Las Vegas khawpuiah Manny Pacquiao leh Keith Thurman te chu an inhnek dawn a, hetah hian Pacman chu a chak ta lo a nih pawhin kum tawpah chuan an inhnek dawn tho niin a sawi bawk.

Pacquiao thupuangtu Fred Sternberg chuan, “Manny hian eng contract mah a ziak lo a, Amir Khan nen inhnek thei tur hian hma a la lo hrim hrim a. Ka hriat theih chinah chuan hemi chungchang hi sawi pawh an sawiho lo reng reng a ni,” a ti.

“Tun hnai kar riat vel zet chu ngawrh takin training a nei a, kar li chhung chu Philippines lamah training hi a nei a, a hnuah kar li chhung chu United States lamah a nei leh bawk a. Hemi hun chhung hian Amir Khan nen hian an inhmu lo hrim hrim,” a ti bawk.

Fred Sternberg chuan Amir Khan chet dan chu mak a tih thu sawiin, eng vanga khatianga dawt vawrh kual chiam nge a nih tih chu a hriat bik loh thu a sawi.

“Khatiang thu belh chian dawl lo a sawi vak mai kha a mak ka ti a, eng vanga dawt sawi chiam nge a nih tih chu amah Amir Khan zawh chian chi a ni,” a ti.

Khan leh division 8 world champion ni thei Pacquiao te hi kum hnih kaltaah khan inhnek thei tura hma lak a ni a, mahse inremna an siam thei ta lo a ni.

Manny Pacquiao hi boxing khawvelah chuan lawmman la hnem ber pawl niin, kum 24 chhungin vawi 61 a chak a, vawi 7 a chak lo a. Amir Khan hi vawi 34 a chak tawh a, vawi 5 a chak lo tawh a ni.