Amir Khan leh Manny Pacquiao te an inhnek thei dawn

25th June 2019, 11:06PM

Amir Khan chuan hun rei tawh tak atanga a lo suangtuah tawh chu a takin a tawng thei dawn hnai niin an sawi a, kumin chhung ngeiin a duhthusam angin Manny Pacquiao nen an inhnek thei dawn a ni.

British boxer Amir Khan hian 2008 atang khan weight category pariat ngawta title lo la tawh Manny Pacquiao hi hnek theih dan a lo zawng tawh a. Khan chuan kawng dap kual viau mahse an inhmachhawn thei lo zel a, tun thlengin a la hlawhtling ta lo a ni.

2017 kumah khan Amir Khan leh Manny Pacquiao te chuan tawngkain inremna an siam a, welterweight category-a inhnek turin an inbe vek a, mahse a tak ram an thleng thei ta chuang lo.

Kumin April thlaa WBO king Terence Crawford hneh lotu Amir Khan chuan hun rei tak a lo nghahfak chu a nghak chhuak thei dawn niin a lang tan a. A duhthusam thleng dik thei tur hi chuan July 12 hian paltlang hmasak tur a nei thung a ni.

Thla thar, July 12 hian Amir Khan chuan Saudi Arabia-ah Neeraj Goyat a hmachhawn phawt a ngai dawn a. Hetiang deuh bawk hian Manny Pacquiao pawhin Keith Thurman chu Khan te inhnek hnuah a hmachhawn ve dawn bawk a, anni pahnih hi intawng thei tur chuan an chak ve ve a pawimawh viau dawn a ni.

Kum 32-a upa Khan chuan, “Manny Pacquiao hian Keith Thurman chu a hneh ngei ka beisei a. Keiin Neeraj Goyat ka hneh bawk ang a, chumi hnuah kan pahnihin ring chhungah kan intawng ve thei tawh turah ka ngai,” a ti.

“Hun rei tak ka nei tawh lo a, hun ka la neih ang ang hi chu hman tangkai viau ka tum hle a ni,” a ti bawk.

Kum 40-a upa Manny Pacquiao leh Amir Khan te hian tun hma deuh khan California-ah Freddie Roach hnuaiah training an nei dun thin a, Wildcard Boxing Club-ah an sparring thin a ni.

July 20 hian WBA welterweight champion Pacman chuan Keith Thurman chu a hmachhawn dawn a. Kumin January thlaah khan Adrien Broner chu point hmangin a lo hneh tawh bawk a. Amir Khan leh Manny Pacquiao te hi an chak ve ve a nih chuan kumin November 9 khian Saudi Arabia-ah an inhnek theih hmel a ni.

Copyright © inkhel.com 2024. All rights reserved.