Pathianni khan Amir Khan chu boxing ring-ah a kir leh a, hun a hmang rei lo hle a, a khingpui Phil Lo Greco chu second 39 chhung chauh a hmaah a ding.

Kum 31-a upa Amir hi kum hnih chhung zet boxing khawvel atangin a bo a, a rawn kir lehnaah hian Canadian boxer Phil Lo Greco nen an inhnek a, an ti tan deuh chauh a, second 39 naah Amir Khan hian a khingpui hi a knock-out nghal der a ni.

‘The Problem’ tia a hming lem an vuah, Phil Lo Greco a hneh hnu hian Amir Khan chuan, “Ka tan chuan harsatna a ni lo,” a ti a. A lehpek atan chuan Kell Brook nen inhnek a chak thu a sawi zui bawk.

An inhnek lai vela New York khawpuia inhnek ve, Jessie Vargas nena inhnehtawk, Adrien Broner an chotuah a, Khan chuan huphurhawm a tih loh thu a sawi a. Thla thara inhnek tur, Manny Pacquiao leh Lucas Matthysse chungchangah Pacman hi chak se, Amir nen hian inhmachhawn se tia an sawi chuan, “Inhnek ropui entir hi ka la chak reng,” tiin a chhang.

Liverpool khawpuia Echo Arena-ah Kell Brook chuan Amir Khan hi hlauh vanga amah pehhel lui angin a puh a, hei vang hian Amir pawh hian hnek a chak hle a. “Kell hi ka hlau chhin eih lo,” a ti.

Promoter Eddie Hearn chuan, “Amir Khan leh Kell Brook inhnek hi a hmuhnawm dawn chiang a, tuna Amir chet dan en phei hi chuan Wembley Stadium chhungah mipui 90,000 chu an pungkhawm ngei ngei ang,” a ti a ni.

Amir Khan chuan, “Ka rawn kir leh chhan bulpui ber chu world champion hi vawi 3 nih ka duh vang a ni a, hei hi ka thupui chu a ni tawp mai,” a ti a. “Lo hlauthawng duh lo ula, Kell nen hian kan inhnek ngei ngei dawn a, ka hneh ngei bawk ang a. Inpeih et awt deuhin ka rawn let leh a, a hma aiin tawh ka khirh daih zawk dawn ania,” a ti bawk.

A sawi zelnaah, “Kum hnih chhung ka bo lai khan ka kut dinglam na ka tidam mai a ni lo a, nasa takin hma ka sawn bakah ka khelh dan pawh ka thlak danglam nual a. Kell ve thung chu boxer tha tak a la nih reng rualin a hma ang bawkin robot ang bawk kha a la ni a, a la inthlak danglam chuang miah lo,” a ti a ni.