22 Apr 2020 05:13

inkhel

Amir Khan-a’n Pacquiao nen inhnek a chak

Amir Khan chuan Manny Pacquiao hmachhawn a chak thu sawiin, tunah rih chuan chawlh tumna a la neih loh thu a sawi.

British boxer Amir Khan chu nikum July thlaah khan Saudi Arabia ah Billy Dib nen an inhnek a, Bolton khaw chhuak hian Middle East lama inhnek leh theih chu a duh thu a sawi a ni.

Khan hian Manny Pacquiao nena inhnek theih hi a chakna a rei tawh hle a, a duhthusam erawh a thleng thei lo a. Nikum November thlaah pawh Khan hian Filipino legend nen chuan inhnek hun tak a nih thu a lo sawi chhuak tawh a ni.

Tun thlengin Amir Khan hian veteran boxer Pacquiao nen inhnek theih chu a chak ber a la nih thu sawiin, an pahniha inhmachhawn theihna hun remchang awm thei se a la tih thu a sawi chhuak.

“Manny Pacquiao hi boxer ropui tak mai, champion dik tak a ni a, inhnek theih ngei hi ka duh a ni. Hlauhna leh huphurhna tel miah loa tu pawh hmachhawn thei nih hi ka duh a ni,” tiin Amir Khan chuan a sawi.

“Qatar hi 2022 FIFA World Cup thleng turin an inpuahchah mek a, hetiang a nih tak rau rauah chuan helai hmunah hian inhnek thei nghe nghe ila, a remchang berin ka ring,” a ti bawk.

Tun thla tir lamah khan Manny Pacquiao chuan Qatar chu nuam a tih thu a lo sawi ve bawk a, inhnek chawlhsan chungchang pawh sawi chhuakin, kir leh a chak thu te pawh a sawi tel a ni.

Pacquiao chuan, “Ka inhnek leh ang em? Ka hre lo a, ka sawi thei lo. Ka rilru hi a phir mek a. Inhnek leh hi ka tan a tul em? Sum lampangah chuan ka dinhmun a tha ve thawkhat a, ka inhnek leh a nih chuan ka hming thatna hi a chhiat phah thei ang em tih zawhna te hi a awm thei a ni,” a ti.

“Zawhna chi hrang hrang awm thei hi a chhanna ka hre bik lo a. Boxing ka hmangaihna hi a reh thei lo a, chuti maiin a reh pawh ka ring lo a. Eng pawh ni se thil awm dan hi han ngaichang zel phawt ila a tha berin ka hria,” tiin a sawi bawk a ni.