21 Apr 2019 03:39

inkhel

​Amir Khan-a’n Crawford a hneh lo

WBO world heavyweight title fight-ah champion lai Terence Crawford chuan British boxer Amir Khan a hneha, a title a humhim.

Crawford hian Khan hi round khatnaah hnek tlu mahse Khan hi a insiamrem leh thuaia, round ruknaah Crawford hi Khan-a serh zawnah hnek fuh palhin Khan hi a inhnek chhunzawm thei lo.

Khan hi hahchawlhna hun pek a ni a, minute nga pek ni mahse a trainer Virgil Hunter-a hnenah a inhnek chhunzawm theih loh thu hrilhin, fight hi tihtawp a ni a, Crawford chu a chak zui ta a ni.

Kum 32 mi Khan chuan, “Inhnukdawh duh lo mi ka ni a, chu ai chuan min knock-out se ka duh zawk. Mahse ka kawnghren huaiah na taka hnek ka ni a, ka na em em a, ka chhunzawm thei ta ngang lo a ni. Ka fan-te lakah thupha ka chawi takzetia, a hmuhnawm chho tan chiah tihah ka chhunzawm thei ta lo a ni,” a ti.

Sawi zelin Khan chuan, “Terence hi fighter ropui tak a ni a, mahse ka kawghren hnuaia hnek tuar ka nih avangin ka pum a na a chhunzawm thei ka nilo. Hetianga inhnukdawh hi ka hreh em em a, bei tang tang chi ni mah ila ka pum a nat mai bakah ka ke ka ti che tha thei lova, Virgil-a’n eng nge ka an min zawh khan ka chet theih loh thu ka hrilh,” a ti bawk a ni.

He fight hi boxing khawvel mai bakah combat sports khawvelin a ngaihven leh a nghahhlelh a ni a, hetianga a tawp ta mai hi a lungawi thlak lova, mi tam takin rematch an hmuh duh thu an auchhuahpui nghal bawk a ni.