11 Apr 2016 05:32

Inkhel

Mizo Sports Website hmasa ber

​Americas GP-ah Marquez pakhatna

Austin, Texas-a Circuit of the Americas-ah Hondo rider Marc Marquez chu pakhatna a ni a, he tlankawngah hian a zawnin kum 4 ngawt pakhatna a ni ta a ni.

Argentina GP-ah pakhatna a nih hnuah Marquez chuan pakhatna a hauh chhunzawm leh a. Lorenzo pahnihna niin Ducati rider Anrea Iannone chu kuminah a vawi khat nan podium-ah a ding ve ta a ni.

Pole atanga bul tan Marquez chuan bul a tan tha lova, Lorenzo a dawk nghal zawk a, hetih lai hian corner hnihna atangin Marquez a rawn dawk chho tan a. Rei an tlan hman lo, Rossi chu turn 2-ah a tleng chhuak a, lap 15 a la awmin Dani Pedrosa chuan turn 1-ah a bike a control zo lova, a tlu chuan Andrea Dovizioso a hnawl tlu chhunzawm bawk. Pedrosa hi a inthiamlo hle a, Dovizioso hnenah ngaihdam a dil nghal a ni.

Andrea Dovizioso hi a vanduai hle a, tluang taka a tlan a nih chuan podium chang thei dinhmuna ding a ni. Argentina GP -ah pawh podium chang thei a nih laiin last lap corner hnuhnung berah a team-mate Anrea Iannone chuan a titlu bawk a nih kha. He tlan kawngah hian an tlu nual a, British rider pahnih Cal Crutchlow leh Bradley Smith pawh an tlu nghe nghe a ni.

Ducati an tha hle tura rin a nih laiin Texas-ah hian Honda rider Marquez a fal hle a, Pedrosa leh Dovizioso an tluk takah chuan Andrea Iannone chu pathumna a ni ta a ni.

"Ka hlim hle a ni, tha takin ka tlan a, ka lawm a ni. Intlansiak hlimawm tak erawh a ni hran lo, chutih laiin point 25 kan hlawhchhuak a. Chu chu a pawimawh ber a ni," tiin pakhatna Marquez chuan a sawi.

Championship-ah Marquez chuan point 21 in hma a hruai mek a, Lorenzo chu pahnihna niin, Rossi chu pathumna a ni mek a ni.

USA result:

1. Marc Marquez (Spain) Honda 43:57.945

2 Jorge Lorenzo (Spain) Yamaha +6.107

3. Andrea Iannone (Italy) Ducati +10.947

4. Maverick Vinales (Spain) Suzuki +18.422

5. Aleix Espargaro (Spain) Suzuki +20.711

6. Scott Redding (Great Britain) Ducati +28.961

7. Pol Espargaro (Spain) Yamaha +32.112

8, Michele Pirro (Italy) Ducati +32.757

9. Hector Barbera (Spain) Ducati +34.592

10. Stefan Bradl (Germany) Aprilia +40.211

pictures credit : crash.net