Formula 1 driver Fernando Alonso chuan tun season zawh atangin F1 a chawlhsan tur thu a puang.

Kum 37 mi hi vawi hnih F1world champion a ni tawha, tun season-a vawi 9 intlansiak tur la awm hi a tlan zawh chuan, kum 17 chhung a lo chenchilh tawh a F1 career chu a ti tawp dawn ta a ni.

Alonso chuan, "Kum 17 hnuah ka tan thildang tih a lo hun ve ta a. Season ka hman tawh zawng zawngah minute tin nuam ka ti em em a, ka F1 career-in a kaihhnawih zawng zawngte chungah lawmthu ka sawi a ni,” a ti,

Sawi zelin, “Tun season-ah Grand Prix tlan tur a la awm nuala, ka tel vek dawna, a hma zawng aiin ka inpe zual dawn a ni,” a ti bawk.

Tunah hian Alonso hian Mclaren-ah contract a nei meka, Ferrari, Menardi leh Renault tante pawh a lo tlan tawh thin a, F1 driver awm tawhah a ropui berte zinga mi a ni.

Alonso hian sawi chhunzawmin, “A tawp berah chuan, ka team hluite, ka team-mate te, ka elpui tawh zawng zawngte, chanchinbu mite leh F1-a ka thawhpui tawh zawng zawngte chungah ka lawm em ema, chuan khawvel hmun hrang hranga ka fan-te chungah pawh ka lawm a, kan in tawn leh ngei ka beisei a ni,” a ti.