​Alli-a’n Barcelona a hmachhawn chak tawh

10th December 2018, 04:12PM

Tottenham chuan an Champions League group stage game hnuhnung berah Catalan club Barcelona chu Camp Nou-ah an luhkhung dawna, Tottenham hian round of 16 an lut duh a nih chuan an chak lo thiang lo tluk a ni.

Group B-ah Barcelona chuan hma an hruai a, lehphelh theih an ni tawh lo. Tottenham chu phnihnaah awmin Inter Milan chu pathumnaah an awm a, Tottenham leh Inter-te hi an point hmuh zat a inang chiah. Point inang chiah nei mahse an tumpui turte an in hrawl hleih hle a, sawilan tawh angin Tottenham-in Barcelona an tlawh dawn laiin Inter hian San Siro-ah group B mawngphahah awm PSV Einhoven an lo mikhual ve thung dawn.

Tottenham midfielder Dele Alli chuan Barcelona chu a hmachhawn chak tawh thu sawiin, “Barcelona hi khawvela team tha ber pakhat an ni a, player ropui tak tak neiin, kan naupan lai zawng zawngin Nou Camp-a khelh hi kan chak thin. Nou Camp-ah Barca hmachhawn turin kan kal dawn a, kan theihtawp kan chhuah dawn.

“Ka hritlang deuha, nasa erawh a ni lo, mahse hritlang hian min ti buai dawn lo. Kan inpeih a, game hautak a ni dawn tih kan hria a, mahse game hautaka tel hi a ni thil chakawm chu. Khawvela team tha ber pakhat; khawvela player tha ber ber kawltu kan hmachhawn dawn a, kan phur hle. Chona hmachhawn hi kan duhdan a ni a, Nou Camp-ah pawh kan chak thei tih rilru pu chungin kan lenglut dawn. A hautak dawn, mahse kan theihtawp kan chhuah ang,” a ti.

Tottenham manager Mouricio Pochettino pawhin Barcelona an hmachhawn tur chungchang sawi ve in, “Chak thei kan ni tih kan inhria a, chu chu a pawimawh ber. Engpawh thleng se hun nuam tak hman kan tum a ni. Europe-a team tha ber pakhat an ni a, kan phur thlang hle bawk. Barcelona hmachhawn hi a chakawm a phurawm em em a ni. Mahse game awlsam a ni dawn lo hle a, hlim kan duh chuan kawng awmchhun chu hnehna chan a ni a, mahse chu chu a harsa dawn hle,” a ti.

Copyright © inkhel.com 2024. All rights reserved.