15 May 2019 08:57

inkhel

Allegri thlaktu atan Jurgen Klopp ka duh ber: Marchisio

Claudio Marchisio chuan Juventus coach Massimiliano Allegri a bang a nih chuan a hmun ruak kalsan luah turin Jurgen Klopp chu a that ber tur thu a sawi.

Tun season-ah Juventus chuan Serie A title chu la leh mahse UEFA Champions League-ah an beisei anga an thlen san tak loh avangin club thuneitute chu an lawm lo hle a. Champions League quarter final-ah Ajax chu an hneh ta lo a, hei vang hian Massimiliano Allegri dinhmun pawh a derthawn phah mek a ni.

Juventus midfielder hlui Claudio Marchisio chuan Allegri chu club hian an ban ta a nih chuan Liverpool boss Jurgen Klopp chu Juventus enkawl tura lak a fuh bera a rin thu a sawi chhuak.

Italian champion Juventus chuan season tan dawnah Real Madrid atangin Cristiano Ronaldo an lei a, European title lak theih an inbeisei hle a. Europe khawmualpuia inelna sang berah Serie A champion te chuan an beisei ram an thleng thei ta lo a, an duh anga hlawhtlinpui thei tur melh an rilruk chho mek niin an sawi.

Massimiliano Allegri chu Juventus president Andrea Agnelli nen an inbe dawn niin an sawi a, hetah hian Allegri awm zel dan tur pawh an ti chiang tura ngaih a ni a. Allegri hian kum khat chhung chu contract la nei mahse a contract chu hmang zo lo thei dinhmunah a ding ta a ni.

Tottenham Hotspur boss Mauricio Pochettino chu Turin club nen hian an sawi zawm tawh a, Didier Deschamps chu rin kai ber a ni mek thung a. Kum 13 zet Juventus tana a khelh hnua, nikuma Zenit lam pantu Marchisio chuan Jurgen Klopp chu a duh ber thu a sawi ve thung a ni.

Marchisio chuan, “Massimiliano Allegri hi a chhuak ta a nih chuan a aiawh turin Jurgen Klopp tluka duh ka nei lo a, ka mi duh lah hi a beiseiawm hmel loh viau lehnghal,” a ti.

“Jurgen Klopp game khelhtir dan hi ka rilrem zawng tak a ni a, Italian football huang chhungah pawh a chet that theih viau ka ring tak zet a. Allegri hi a la awm zui zel dawn a nih pawhin a fuh lohna tur engmah ka hre lo a, coach naran a ni lo a, chak zel thin a ni tih chu kan hre chiang tawh a ni,” a ti.

AC Milan leh Sassuolo boss hlui Allegri chuan Juventus chu kum nga chhung a enkawl ve ta a, hemi chhung hian Serie A title panga leh Coppa Italia title pali a lakpui bakah UEFA Champions League final-ah vawi hnih a luhpui tawh bawk a ni.