25 Jan 2019 05:07

inkhel

All-Star Game captain tur LeBron leh Giannis

LeBron James leh Giannis Antetokounmpo te chu thla thara NBA All-Star Game an khelh huna team pahnih captain turin an ruat fel a. Anni pahnih hi vote hmanga captain tur an zawnnaah an awmna conference-ah an sang ber ve ve a ni.

February 17 khian Charlotte, North Carolina-ah NBA All-Star Game an khel dawn a, Los Angeles Lakers superstar LeBron James leh Milwaukee Bucks palian Giannis Antetokounmpo te chu team pahnih captain atan hian an thlang a ni.

Western Conference-ah LeBron James chu captain a ni ang a, Oklahoma City Thunder forward Paul George, Golden State Warriors forward Kevin Durant, Golden State guard Stephen Curry leh Houston Rockets guard James Harden te nen an inkawp dawn ni.

Eastern Conference lamah Giannis Antetokounmpo chu Toronto Raptors star Kawhi Leonard leh Philadelphia 76ers star Joel Embiid te bakah Charlotte Hornets guard Kemba Walker leh Boston Celtics guard Kyrie Irving te nen an inkawp ang.

NBA All-Star Game khelh tura bul tantu tur mi 10 zingah Kemba Walker chiah hi bul tantu a nih vawi khatna a ni a, mi dangte chuan kum dangah bul an lo tan tawh hlawm a. LeBron James phei chu vawi 15 a telna a ni tawh dawn a, All-Star Game khelh hnem lamah Kobe Bryant a nihrual thei dawn chiah a ni.

West lampang tana bul tantu turte chu a lo berah vawi ruk vel lo tel tawh an ni hlawm a. East lamah chuan Irving chu a tel hnem ber a, vawi ruk vel tel tawhin, an captain tur Antetokounmpo chu a vawi thum inlanna a ni bawk ang.

February 7 hian captain pahnih te chuan an team member dang turte chu an thlang dawn a. 2018 a vote hmu hnem ber James hian Team James a khel turte a thlang hmasa dawn a, reserve thlengin an thlang dawn a. Team member leh reserve tur te hi kar leh lam khian an puangzar dawn a ni.