Vawi 4 ngawt MVP lo ni tawh LeBron James chu a la vul mek zel a, tunah hian NBA All-Star Game atana vote thlak mekah hmahruaitu a la ni.

Western Conference bikah hian Dallas Mavericks rookie Luka Doncic, Minnesota Timberwolves guard Derrick Rose leh Golden State Warriors player pahnih Stephen Curry leh Kevin Durant te chu vote hmu sang dangte an ni.

Eastern Conference-ah Milwaukee Bucks star Giannis Antetokounmpo chu fan te vote hmu hnem ber niin, a pumpuiah LeBron James hnaihtu ber a ni mek a. Toronto Raptors star Kawhi Leonard, Philadelphia 76ers chhuanvawr Joel Embiid, Miami Heat guard Dwyane Wade leh Boston Celtics guard Kyrie Irving te chu Giannis Antetokounmpo hnuaiah an awm bawk a ni.

NBA fans te hian December 25 atang khan vote an thlak tan a, All-Star game bul tan tur 10 thlannaah hian fans te vote hian awmzia a nei thui hle a, 50% hi chu NBA chuan thutlukna siamna atan an hmang thin a ni.

Mipui vote 50% bakah hian NBA player ni mek vote 25% leh basketball media panel vote 25% te chu an la thin a. Vote thlaktu pakhat zel hian conference hrang hrang atangin guard pahnih leh frontcourt player pathum zel an thlang a. Conference tina vote hmu sang berte chu team captain an ni zel dawn a, captain te hian an awmna conference zelah roster an siam fel theuh dawn a ni.

Captain te hian an duh player te chu an thlang chhuak ang a, reserve tur chu NBA head coach te vote hmanga chin fel a ni thung ang a. Captain te draft hi tun season-ah chuan TV lama thlir theihin an ti chhuak ang.

Vote thlak hun hi January 21 thleng an hawng ang a, All-Star bul tantu tur leh captain te chu January 24 hian puanzar a ni ang a, reserve te pawh January 31 ah an puang dawn bawk a ni.