17 Sep 2020 03:45

inkhel

All-NBA team-a tel ngun ber zingah LeBron James

LeBron James chuan bung thar a kai a, All-NBA team ah an telh ve leh a, vawi 16 a telna ni tawhin, tel ngun record awm lai a nihrual ve ta.

NBA Hall of Fame-a an lawm luh tawh Tim Duncan, Kobe Bryant leh Abdul-Jabbar te chu All-NBA team-ah vawi 16 theuh an lo telh tawh a, an thlan tel ngun ber record an siam a, hei hi tuna an telh thar leh LeBron James chuan a nihrual ve thei ta chiah a ni.

All-NBA first team-ah hian LeBron James bakah NBA Most Valuable Player Giannis Antetokounmpo, James Harden, Luka Doncic leh Anthony Davis te chu an telh a. NBA legend pathum te a nihrual theih bakah James chuan a record siam tawh chu a belh zel bawk a, NBA All-NBA first team-ah vawi 13 a tel ta chiah bawk a ni.

James hi a zawnin vawi 11 chu All-NBA first team-ah hian a tel hman a, season liam taah khan a inhliam avangin season a hmang tluan thei ta lo a, hei vang hian first team-ah tel loin third team-ah a tel phah ta a. Kum 35-a upa ni tawh mah se basketball player la chawl lo zingah chuan a tha ber a la nih zia a lang chiang hle.

A chunga tar lan player panga te bakah player dang 10 pawh team dang pahnihah an thlang a. Guard pahnih Chris Paul leh Damian Lillard, forward pahnih Pascal Siakam leh Kawhi Leonard te bakah center Nikola Jokic te chu second team-ah an thlang a. Guard pahnih Ben Simmons leh Russell Westbrook, forward pahnih Jayson Tatum leh Jimmy Butler te bakah center Rudy Gobert te chu third team-ah an thlang bawk a ni.

A hmaa All-NBA team-a tel thin langsar tak tak Stephen Curry, Kevin Durant, Blake Griffin leh Kyrie Irving te chu inhliam vangin tun tumah an hming a lan ve loh phah a. Kumina mi 15 an thlan chhuah zingah hian Doncic, Tatum, Simmons leh Siakam te chu an thlan hmasak ber tum a ni hlawm.

Lakers player pahnih LeBron James leh Anthony Davis te chu 2006-07 hnua teammate zinga season khata All-NBA first team-a tel dun thei hmasa ber an ni a, 2006-07 khan Suns player pahnih Steve Nash leh Amar’e Stoudemire te chu an lo tel dun tawh a, he mi hnuah hian teammate tel dun thei an awm leh ta miah lo a ni.

Season khata All-NBA team-a teammate tel dun thei te:
Davis-LeBron : 2019-20
Stoudemire-Nash : 2006-07
Shaq-Kobe : 3 times
Jordan-Pippen : 1995-96
Malone-Stockton : 2 times
Bird-McHale : 1986-87
Magic-Kareem : 2 times
Erving-Malone : 1982-83