Boxing promoter lar tak Bob Arum chuan Muhammad Ali hnua boxer a enkawl tawhah Vasyl Lomachenko ala țha ber tih a sawi.

WBO world super-featherweight kawnghren kawl mektu Lomachenko hian Inrinni hian Guillermo Rigondeaux a hmachhawn dawn a, Rigondeaux hi WBA super-bantamweight kawnghren kawl mektu a ni ve thung.

Madison Square Garden-a inhnek tur hi Ukrainian boxer Lomachenko-a'n professional bout a hmachhawn vawi 11-na tur a ni a, Boxing chanchina Olympic champion vawihnih ni ve ve tawh an in hmachhawn vawikhatna tur a ni bawk.

Arum chuan, "Lomachenko anga boxer thiamna nei țha hi ka la hmu ngai lo. Zep leh thup awm hauh lovin Muhammad Ali hnua boxer ka neih țhat leh ber a ni."

"A chawlh hunah pawh mite'n boxer țha tiin an sawi ang a, Muhammad Ali, Sugar Ray Robinson leh midangte ang bawka ropui tiin an hria ang ang." tiin a sawi.

Kum 85 mi Arum hian Roberto Duran, Floyd Mayweather leh Manny Pacquiao-te bakah boxer tam tak a enkawl tawh țhin a, Lomachenko a enkawl thei hi atan chuan a thlawna thilpek niin a sawi bawk.

Weight hrang hrang palia world champion ni thei Roy Jones Jr pawhin Lomachenko leh Rigondeaux inhnek tur hi remruatna țha tak niin a sawi ve bawk.

Kum 37 mi Rigondeaux hian kum 2000 leh 2004 khan Olympic-ah gold a hnekchhuak a, Lomachenko hi a hneh chuan weight hrang pahnihah world champion a ni ang.

Lomachenko hian professional a luhchilh hnuin match 10 a khelh tawhah hnehloh vawikhat a nei a, Rigondeaux thung hi chuan match 17 khel tawhin hnehloh ala nei lo.