15 May 2019 05:28

inkhel

Alexis Sanchez leh Cersei Lannister an tehkhin

Manchester United forward Alexis Sanchez leh Game of Thrones-a lalnu pakhat Cersei Lannister te chu an tehkhin a, anni pahnih hi eng vak mah ti loa hlawh la teuh niin an sawi.

Tunlaia TV series lar em em Game of Thrones-ah Lena Headey chu Cersei Lannister angin a chang a, season khatah £770,000 a hlawh niin an sawi a. Tun season-ah chuan Cersei hi a lan ve chhunah pawh a thil tih a tlem em em mai a, Game of Thrones ngaisangtute chuan tukverha dak chunga wine in vangin sum tam tak a hai lut niin an sawi fiam a ni.

Twitter hmangtute chuan Chilean forward Alexis Sanchez chungchang leh Cersei Lannister chungchang hi an kai kawp vat a, an hun hman dan vel chu inanna deuh a awm niin an sawi a. Manchester United player zinga hlawh hnem ber Alexis Sanchez pawhin club tana thil tangkai ti si loin hlawh a la hnem hle niin an sawi a. Journalist Ronan Murphy pawhin Lena Headey chu ‘TV Alexis Sanchez’ tiin a sawi deuh kher bawk a ni.

Alexis Sanchez chuan January 2018 khan Emirates Stadium chhuahsanin Old Trafford lam a pan a, Manchester United a zawm hnuah chet fuh a nei meuh lo a. A chet chhiat tluan em avangin tun hnaiah Sanchez hian Manchester United tantute chu ngaihdam a dil hial a, an beisei anga a chet theih loh chhan chu a inhliam ngun vang niin a sawi chhuak.

Sanchez chuan, “Tun season kha ka tan chuan a hautakin a khirh em em mai a. United tantute an zahawmin an fakawm hle a, eng thil pawh thleng se, rinawm takin kan club an tan chho reng mai a. An beisei anga ka chet that theih loh avangin an hnenah hian ngaihdam ka dil tak meuh meuh a ni,” a ti.

“A nihna takah chuan ka lakah beiseina an nei sang hle tih ka hria a, mahse a khat tawka ka inhliam leh thin avangin duh angin ka khel thei thin lo a. Ka inkhelh ve chhunah pawh a kar laka chawlh fo a ngaih avangin ngai a awh theih tak tak lo thin a. Inhliam tur te hi a hriat lawk thin si lo a, a pawi tak tak a ni,” a ti bawk.

A sawi zelnaah, “Media leh mi reng reng hian ka chanchin hi ni lo deuh deuhin an lo theh darh ve fo lehnghal a. Heng thuthang tam tak hi chu belh chian dawl lo tak tak an ni hlawm a. Kawng engkimah professional ka nihna ka lantir zel chuan ka hria a, kan club tantute hnenah an tum ram ka thlenpui theih loh avangin ngaihdam ka dil a. Eng pawh ni se, Manchester United kan la ni reng a ni,” a ti.

Manchester United thuneitute chuan Alexis Sanchez hi hmun danga kaltir dan an ngaihtuah mek niin sawi a awm a. Sanchez hi kawl duh an awm a nih chuan United hian a hlawh chanve, £13 million zet chu pek an inhuam thu an sawi a ni.

Alexis Sanchez Old Trafford-ah kum thum chhung atan contract la nei mahse, club lampang hian a contract hman zawhtir kher hi an tum hran lo hle.