Alexis Sanchez a chhuak dawn hnai

03rd August 2020, 10:08PM

Alexis Sanchez chuan a nghetin Manchester United a chhuahsan dawn hnai a, Inter Milan chuan Chile forward hi lei an remti tawh niin an sawi.

Inter Milan chuan Alexis Sanchez hi Manchester United atangin an hawh chhuak mek a, Serie A club hian Sanchez hi a ngheta lak luh an duh a, £13.5 million velin an lei theih hmel a ni.

Manchester United chuan kar khata £350,000 zet hlawh mek Alexis Sanchez hi Old Trafford-ah an beisei anga an tangkaipui theih loh avangin hralh chhuah ngei an duh a. A hlawh san avang hian club dangin an lei hreh phah zel avangin an hralh thei meuh lo a ni.

Serie A lamah loan-in a kal a, Inter Milan chuan an chhawr fuh chho bawk a, a ngheta lei zui hi an hreh loh phah ta a. Nilainia Europa League lama Getafe nen an inkhelh hnuah chuan thu chiang an puan theih tawh an beisei thu an sawi a ni.

Arsenal atanga Manchester United in Alexis Sanchez an lei hnuah hlawh sang em em mai an pe a, khelmualah an chhawr fuh thei lo hle a, hei vang hian inkhelhna hmun pawh a chang tam thei lo a. Khel mang loa hlawh tam tak a lak reng bawk si avangin United hi an mangang hle a, loan hian an chhuahtir ta a ni.

Old Trafford-a inhliam ngun em em mai Sanchez hian Italy ram a pan hnuah inhliam a sawi tlem a, khelmualah pawh a rintlak chho leh viau mai a. Serie A club tana a khelh hian Manchester United chuan kar khata a hlawh £350,000 ah hian £200,000 chu an la tum a, Inter Milan chuan £150,000 an tum ve thung a ni.

Italy ramah hian a ngheta a kal thei dawn a nih chuan Inter Milan hian Sanchez chu a hlawh pangngai ang chu pek an tum lo hle a, nasa taka a hlawh tihniam turin an nawr tawh a. Kum thum chhung atan contract an ziah a rinawm a, June 2023 thleng an hnena cham turin Sanchez hi thuthlung ziahpui an duh dawn niin an sawi a ni.

A hmain Inter Milan hian Manchester United atangin Romelu Lukaku leh Ashley Young te pawh an lo la tawh a, coach Antonio Conte chuan Alexis Sanchez pawh hi lak tel ngei a duh a ni.

Kum 31-a upa Sanchez hian Old Trafford-ah kum hnih dawn chu contract a la nei a, August 7 hi Manchester United lama a kir leh hun tur a ni a. Inter Milan duh anga thil a kal a nih chuan England ramah hian a kir a ngai tawh lo thei a ni.

Copyright © inkhel.com 2024. All rights reserved.