15 Feb 2019 05:03

inkhel

Alexis hi Arsenal-ah a kir leh thut thei: Overmars

Marc Overmars chuan Alexis Sanchez chu Manchester United chhuahsanin Arsenal lamah a let leh thut thei niin a sawi.

Arsenal star hlui Marc Overmars chuan Arsenal chhuahsana Manchester United a zawm hnua che fuh thei lo tak Alexis Sanchez chu Emirates Stadium a chhuahsan avanga a inchhir tawh tur thu sawiin, tunah chuan Old Trafford atanga chhuah a, a club hlui lam pan leh a duh tawh a rin thu a sawi a ni.

2017-18 season-ah khan Chile forward Alexis Sanchez chuan Arsenal chhuahsan a duh thu a tilang nasa a, a contract a hmang zo tawh dawn si a, Arsenal chuan free agent a nih hma ngeia thehthang dan an ngaihtuah vat a. Transfer window inkhar hma deuh chiahin United nen an inbe rem thei a, Henrikh Mkhitaryan nen an inthleng thei a ni.

Club pahnihte player inthleng hian tifuh an inti vak lo ve vein a rinawm a, an player pahnihte hian beisei an pha lo ve ve a tih theih a. Alexis Sanchez hi Henrikh Mkhitaryan ai chuan a la che chhe zawk daih a, United tana game 37 khelh tawhah goal 5 chauh a thun thei a, a hlawh erawh a sang em em lawi si a ni.

1997 leh 2000 inkara Arsenal tana khel, Dutch star Overmars chuan Sanchez chungchang hi sawiin, “Alexis hi Arsenal-ah khan a che tha thei hle a, hei vang hian ka ngaisang a. Chhuah kha a rilruk tlat mai a, a chhuak ta hi thutlukna fuh tak niin ka hre thei lo a ni,” a ti.

“English football hian mi a tidanglam nasa thei hle a, helai khawvela kan inhnim tawh hi chuan a pangngai angin kan awm reng thei lo chiang a, kei pawhin nasa takin hma ka sawn phah a ni. Arsene Wenger kha kei aiin Arsenal-ah kum khatin a lut hmasa a, Dennis Bergkamp khan England ah chuan hnuhma lian tak a hnutchhiah a. Chutiang zel chuan Arsenal kha a tha zawngin kawng tam takah kan thlak danglam ve chiangin ka hria,” a ti bawk.

Kum 30-a upa Sanchez chuan Arsenal tana a khelh laiin boruak a nei tha hle a, game 166 khelhah goal 80 ngawt mai a thun thei a. Hetiang taka a chet that chhoh takah chuan hmun dang pan duhna rilru a nei lian chho a, a hnuah United a zawm ta a, mahse Emirates Stadium-a a boruak nen a inthlau ta hle a ni.

Overmars chuan, “Sanchez te ang chi hi Arsenal tan an pawimawh hle a, a chhuah hnuah khan Arsenal chuan amah ang chi lak luh leh an tum viau a, mahse an hlawhtling ta rih lo a. Sanchez lah a club tharah beisei angin a che thei lo hle a, hetiang hi an boruak a nih mek avangin Sanchez pawh hian Arsenal lama kir leh hi a hreh loh mai a rinawm a. Chutiang a nih si chuan Arsenal pawhin lo lak let leh hi an hnial lutuk lo ve thei a ni,” a ti.

Alexis Sanchez chuan Old Trafford a luhchilh tirh khan kum li leh a chanve chhung atan contract a ziak a, a contract ziah hi 2022 thlengin a dam dawn a ni.