Gareth Southgate chuan Euro 2024-a England game hmasa pahnihah Trent Alexander-Arnold chu midfield-a dahin, Declan Rice nen a inkawptir. 

Alexander-Arnold midfield-a dah kha a fuh vak lo niin a lang a, Southgate chuan second half-ah a la chhuak leh thin.

Football pundit Roy Keane chuan, "Game hniha lak chhuah ngai ve ve a nih chuan, game plan tha tak chu a ni lo chiang mai.

"TAA midfield-a dah hi risk a sang hle. Kar tin midfield-ah a khel pawh ni hlei lo. Liverpool-ah khan midfield-ah a tawlh lut thin alawm, mahse midfield-a tawlh luh leh midfield position-a awm ngheh hi thil inang lo tak a ni.

"Midfield-ah ka khel thin, position hautak em em a ni, tharum a ngai a, tlan kual hnem a ngai bawk. 

"TAA thiam loh a ni lo a, amah chhawrtu Gareth Southgate-a thiam loh a ni. Full back ni si midfield-ah dah kha risk sang tak a ni.

"England hian France leh Spain an hmachhawn lo, awlsam taka hneh theih tur nia lang an la hmachhawn mai chauh a nia, chuti chung chuan khelh harsa an ti em em si," tiin a sawi.

England chuan Group C match pahnih atangin point 4 an hlawhchhuak a, an match hmasa berah Serbia an hneh hram a, an match hnihnaah Denmark nen 1-1 in an inhnehtawk.

Point 4 neiin England chu Group C hmahruaitu an ni mek. Knock out stage lut turin an dinhmun chu a tha, mahse an game en erawh chuan champion tura rinkai an ni ta hauh lo mai.