13 Aug 2019 05:55

inkhel

Alexander-Arnold hi Beckham ang teuh ber a la ni: Murphy

Danny Murphy chuan Trent Alexander-Arnold chu Manchester United legend David Beckham hnuah chuan English footballer zinga ball cross thiam ber a nih thu a sawi.

Kum 20-a upa Trent Alexander-Arnold chu Anfield academy atanga inzir chhuak niin, a kum la tlem ngaihtuah hian senior team lamah boruak a siam chho viau mai a. Khelmualah a chet that theih em avangin Jurgen Klopp chuan a chhawr nasa viau a, Gareth Southgate pawhin England squad-ah hmun a chantir nasa chhoo hle.

Liverpool full-back hian khelmual sir lam atangin lehlam pawl goal lamah ball a vawrh phei nasa thei hle a, mi goal thun tur a siamsak nual tawh a. Season hman zawh takah khan inelna hrang hrangah chutianga ball a vawrh hmang chuan mi goal thun tur vawi 16 ngawt a siamsak a. UEFA Champions League semi final-a FC Barcelona nen an inkhelh tumin rang zetin corner a pet a, goal an thun theih phah nghe nghe a ni.

2019-20 season bul an tan a, bul pawh a tan tha viau a. 4-1 ngawta Norwich an hneh tumin Divock Origi goal thun tur a siamsak a, lehlam pawl goal hnaiha an pawlte tana ball tha tak pek kawngah leh set-piece velah te fak a hlawh hle a, David Beckham nen an khaikhin chho tan mek a ni.

Liverpool midfielder hlui Danny Murphy chuan, “Gareth Southgate chuan rilru hahna lian tak a nei a, a rilru hah dan tur hi a tha zawngin a ni thung a. Tun dinhmunah chuan England hian Europe khawmualpuia right-back tha ber ber pathum an nei mek a ni,” a ti.

“Kyle Walker, Trent Alexander-Arnold leh Aaron Wan-Bissaka te an awm a, hetiang taka player tha rual neih hi thil harsa tak mai a ni a. Trent hian player tha chungchuang tak a nih zia a lantir fo a, hetiang player tha hi kum tam tak kan hmu tawh lo a ni,” a ti bawk.

A sawi zelnaah, “Ka tan chuan Trent hi ball vawrh thiam em em mai a ni a, hetiang taka ball pet dik leh chhuah tha thei hi David Beckham hnuah ka la hmu leh miah lo a. Trent Alexander-Arnold hi Bekcham ang thei hnaivai ber a la ni,” a ti.

“Technical lamah a tha em em a, passing a tha em em bawk a, full-back tih atana awihawm loh khawpa tha hian a khel deuh zel mai a. A tlangpuiin a ball pet dan hi midfielder ho tih tura kan dah thin ang kha a tam hle a. Trent hi kum 20-a upa chauh la ni mahse Champions League final hnuhnung pahnih kha a khel thei tlat tawh a ni,” a ti bawk.

Alexander-Arnold hian Premier League game 50 chuang a khel tling tawh a, England tan vawi 6 chu a khel tawh a, UEFA Champions League title a la tawh bawk a ni.