Manchester City winger Riyad Mahrez chu Saudi Arabia lam nen sawizawm a ni ve leh ta a, Mahrez hi Saudi Pro League khel tur club Al Ahli chuan lakluh an duh niin chanchinbu mite chuan an tarlang.

Kuminah Saudi club te an inla tha nasa hle a, Al Nassr chuan Cristiano Ronaldo an lakluh bakah Wilfried Zaha lakluh an tum a, Saudi Pro League season khelh zawh ta a champion Al Ittihad chuan Karim Benzema an lakluh tawh bakah, N’Golo Kante pawh an lalut leh dawn.

Hetianga an elpui tur te an inlak that avang hian Al Ahli pawhin hma an la ve mek a, Mahrez hi beisei viau mah se, official in Manchester City an la dawr lo nia sawi a ni a, an dawr thuai tura ngaih a ni.

Mahrez hian City-ah season khat daih contract a la nei a, City hian an chhuah tir dawn a nih pawhin man nei lova chhuah tir an tum lo tih tarlan a ni a, City hian Mahrez-a manah hian engzat chiah nge an chhiar tih erawh sawi theih a la ni lo.

City manager Pep Guardiola-a’n bench-a a dah fo avangin Mahrez hi hlawh tam zawk hlawh turin a chhuak hreh lo niin chanchinbu mite chuan an tarlang bawk a, City pawh hian an chhiarna zatin Al Ahli hian an dawr a nih chuan an chhuah tir mai a rinawm hle.

Kum 32 mi hian season thara City-a a dinhmun tur a hrechiang duh a, Guardiola chuan tun season aia chhawr tam a tum loh chuan, Al Ahli pan turin chhuah a ngiat dawn nia sawi a ni.

Season liamta khan Al Ahli hi Saudi First Division League-ah an champion a, season tharah Saudi Arabia-a football league sang ber Saudi Pro League khel dawnin, an squad thawm that nan Mahrez bakah hian player langsar dang an dawr nual a rinawm a ni.