Ajax leh Juventus boruak chu a inang lo hle: De Ligt

16th October 2019, 03:10AM

Matthijs de Ligt chuan Ajax-ah kha chuan dan theih loh ni hiala a inhriat thin thu sawiin, Juventus-ah chuan a boruak a danglam tawh hle niin a sawi.

Nipui transfer window inhawn lai khan Juventus chuan Matthijs de Ligt hi £75 million zetin an lei a, kha transfer window inhawn laia player man to pawl tak a ni nghe nghe a ni.

Kum 20-a upa De Ligt hi Ajax tan a che tha thei hle a, hetianga boruak a neih that vang tak hian man to tham deuhin Serie A champion pawh hian an lei phah a. Italy ram a pan hnuah erawh beisei angin boruak a nei fuh thei meuh rih lo thung.

De Ligt hian tun season-ah Serie A leh UEFA Champions League-ah bul a tan khat hle a, heng inelna pahnihah hian vawi 7 chiah bul a la tan ve thei a ni.

“Ajax-ah kha chuan boruak a fuh thei hle a, dan theih loh ni hiala inhriatna te kha ka nei ve thin a. Tunah erawh chanchin a danglam hle a, boruak hrang hlak a ni tawh a ni,” tiin De Ligt chuan a sawi.

“Tum angin thil chu awm rih lo mah se a nih dan tur tak te pawh a tih theih a. Ka tan chuan engkim mai hi thil thar vek a ni a, boruak lian tak neih nghal theih chu thil harsa leh beiseiawm lo tak a ni a. Hma ka sawn ve hret hret a, engmah hlauhthawn tur ka nei lo,” a ti bawk.

Juventus tana a khelh ve tawhah De Ligt chuan sawisel a tawk nual a, Napoli nen an inkhelh tumin Old Lady chu 4-3 in chak mah se central defender hi an sawi zui tho a. Inhliam Giorgio Chiellini chu a thlak a, Napoli goal thum thunah chuan tihsual a nei vek niin an sawi a ni.

Copyright © inkhel.com 2024. All rights reserved.