WBA, IBF, WBO leh IBO heavyweight champion lai Mexican-American boxer Andy ‘Destroyer’ Ruiz chuan kumin kum tawpa Anthony Joshua nen rematch an neih zawh hnuah a chak a nih chuan British boxer Tyson Fury hnek a duh thu a sawichhuak.

June ni khat khan Ruiz hian beisei loh takin Anthony Joshua hi a hneha, AJ-a heavyweight title kawl lai chhuhsak vekin, kumin kum tawp hian Ruiz leh AJ-te hi an inhnek leh dawna, Ruiz hian a title kawl laite humhim a tum dawn.

Kum 29 mi Ruiz hian kum 30 mi Fury chu hnek a duh thu a sawi rual hian, WBC world heavyweight champion lai kum 33 mi Deontay Wilder pawh hnek a duh thu leh a belt chhuhsak a duh thu a sawi tel.

Ruiz chuan, “Anthony Joshua laka hnehna ka chan zawh hi chuan Tyson Fury hi hnek ka duh. Wilder pawh a awm a, ka belt duh; WBC belt a kawl meka, WBC belt hi ka chhuhsak thei a nih chuan undisputed champion ka ni dawn a, heavyweight division-a belt awm zawng zawng ka nei anga 'Lal' thar ka ni dawn. Tyson Fury hi chu tunlaia hming langsar ber a niin ka hria,” a ti.

Social media lamah Ruiz leh Fury-te hi an in chhang deuh tawh thina, Ruiz hian AJ a hneh leh ngat a nih chuan Fury nen an inhnek lovang tih a sawi theih loh.

Ruiz leh AJ-te hi kumin December ni 14 hian Cardiff khawpuiah Principality Stadium-ah an inhnek leh hmela, a nih loh pawhin Madison Square Garden, USA-ah November ni 29 hian an inhnek ang.