Kumin June ni 20-a Tottenham Hotspur Stadium-a inhnek tura tih Anthony Joshua vs Kubrat Pulev chu sawn hlat a ni a, an inhnek hun tur a la sawi theih rih lo.

Sawilan angin June thla ni 20 hian British heavyweight boxer kum 30 mi AJ chuan Premier League club Tottenham home-ah Bulgarian boxer kum 38 Pulev chu a lo mikhual dawna, hetah hian AJ hian a heavyweight title kawl lai zawng zawng a thap dawn.

AJ hi tunah hian IBF, WBA, WBO leh IBO world heavyweight champion lai a ni meka, heng title te hi Pulev chuan chhuhsak tum dawn mahse an nghah leh rih deuh a ngai dawna, an inhnek hun tur hi ngaihtuah mek a ni.

Tunah hian coronavirus darh mek avangin British Boxing Board of Control hnuaia inhnek tur zawng zawng te chu sawn hlat vek an ni a, hri leng mek avangin eng mah tih theih a ni rih lo.

AJ leh Pulev te hi kum 2017 khan Cardiff Principality Stadium-ah inhnek tura tih an lo ni tawha, mahse Pulev hian a darah hliam a neih avangin a lo inhnukdawk tawh.

Nikum December thla khan AJ hian Saudi Arabia-ah Andy Ruiz hi a hneha, hetah hian a hma lawka a title hloh te la kurin, Pulev hi mandatory challenger a ni.