British heavyweight boxer Anthony Joshua chuan kumin June ni 1 hian American heavyweight boxer Jarrell Miller hmachhawn tur ni mahse Miller hian drug test a paltlang zawh loh avangin he fight hi thulh a ni dawn.

Miller hian drug test hi a lo paltlang lo tawh a, hemi a nih avang hian New York State Athletic Commission chuan Miller hi AJ a hnek phalna license an pe duh lova, tunah test dang a paltlang zo lo leh.

NYSAC test a paltlang zawh loh hnu hian Miller hian Voluntary Anti Doping Agency test a paltlang zawh loh leh bawk avangin AJ nen hian an inhnek thei dawn lo niin a langa, AJ-a tumpui tur dang dap mek a ni.

NYSAC test chauh a paltlang zawh loh khan Miller hian AJ a la inhnekpui theih tho a rinawm a, tunah erawh tih ngaihna vak a awm tawh lova, AJ hi a inhnekpui tur chuan ngaihven a hlawh nghal hle.

Miller-a hmun luah tur hian Cuban boxer Luis Ortiz, Polish boxer Adam Kownacki leh American boxer Michael Hunter-a te hming chu a langsar hle a, an pathum zinga pakhat hi AJ hian a hmachhawn a rinawm.

IBF, WBA leh WBO heavyweight champion lai AJ –a agent Eddie Hearn chuan AJ-a tum tur hi kar leh lamah puan a nih dawn thu a sawi a, American ngei nise a duh thu a sawi bawk a ni.