Unified world heavyweight champion Andy Ruiz chuan British boxer Anthony Joshua chu rematch-ah a hneh leh ngei tur thu a sawi a, AJ hian boxing a thiam lo niin Ruiz hian a sawi bawk.

Kum 29 mi Ruiz hian kumin June thla ni khat khan hneh lo la nei ngai lo Anthony Joshua a tlawm a, AJ-a IBF, WBA leh WBO heavyweight title te a chhuhsak, kumin kum tawpah an intum leh nghal dawn.

Ruiz chuan AJ nena an rematch tur chungchang sawiin, “Rematch pawh hi kan inhnek hmasak ang chiah a ni leh dawn a, a hma aiin ka inpuahchah tha dawn a, ka inpeih zawk dawn bawk. AJ hi a that lohna lai ka hria a, a hma aiin ka tha zawk ang. AJ hian ring chhunga tlan kual bak a thiam lova, boxing a thiam lo,” a ti.

Ruiz hi California, USA-a piang ni mahse a nu leh pate hi Mexican an nih avangin Mexico hmingin a chhuak thin a, Mexican zinga world heavyweight champion ni thei hmasa ber a ni.

Ruiz hian hneh theih loh tluka ngaih AJ chu tun thla tir khan rinkai lo zawk ni chungin a hneha, he inhnekah hian AJ hian a hneh lo angreng viau. Rematch a awm leh a nih chuan Ruiz hi chak tura rinkai zawk a ni tawh ngei dawn a, a hneh leh lovang tih a sawi theih loh a ni.