25 Apr 2020 12:50

bakteaJr.

Mizo tlangval

​AJ emaw Fury emaw hmachhawn tura rawn kir hreh lo Haye

British heavyweight boxer hlui, world champion hlui ni bawk David Haye chu boxing khelh chawlhsan tawh mahse Anthony Joshua emaw Tyson Fury emaw hmachhawn tura boxing khelh leh a hreh loh thu a sawi.

British boxer pahnih AJ leh Fury te hian heavyweight division-a world title awm zawng zawng an kawl veka, an pahnih hian unified heavyweight champion zawn nan an inhnek ngei a rinawm bawk.

AJ leh Fury te hi inhnek tura ngaih ni mahse, mandatory challenger hmachhawn tur an nei ve ve a, AJ hian a title kawl lai te chu Kubrat Pulev-a lakah humhima tum dawna, Fury hian a title kawl lai chu Deontay Wilder-a lakah humhim a tum bawk dawn.

Kum 39 mi Haye chuan, “Boxing khel tura ka rawn kir leh dawn chuan min ko chhuak thei tu thil pakhat chiah a awm; chu chu AJ leh Tyson Fury-a chak zawk zawk hmachawn turin a ni a, a chhan chu no 1 vs no 1 a ni dawn. He fight chiah hian min ko chhuak thei ang.

“Ka taksa hi tunah hian a fit tha a, ka dinhmun pawh a tha. Ka hliam zawng zawng te a dam kim tawha, training lam hi nasa takin bei lo mahse ila, in lamah rit chawi lam chu ka ti reng a ni,” a ti.

Haye-a inhnek hnuhnun ber hi kum 2018 May thla kha a ni a, Tony Bellew lakah tlawmin, kum 2018 June thla khan boxing khelh a chawlhsan thu a puang.