British heavyweight boxer Anthony Joshua chuan British boxer hlui Lennox Lewis chu a hmachhawn chak thu a sawichhuak

AJ leh Lewis-te hi an kum a inthlau em em a, AJ hi kum 30 mi niin Lewis hi kum 54 mi lai a ni ve tawha, kum 2003 khan boxing khelh a lo chawlhsan tawh.

He bout hi thil thleng ngai lo tur ni mahse AJ hian heavyweight division-a undisputed champion hnuhnung ber Lewis nena Wembley Stadium-a inhnek chu a duhthusam a nih thu a sawi.

Lewis hi tunah hian pundit a ni a, AJ-a’n nikuma Andy Ruiz a hneh loh khan Lewis hian na takin AJ hi a lo sawisel tawha, AJ pawh hian a chhanglet nghe nghe.

Mahse AJ hian nikum vek khan Ruiz hi hneh leh nghalin tunah hian AJ hian heavyweight title pali zinga pathum a kawl mek.

Boxer a hmachhawn chak chungchanga zawhna chhangin AJ chuan, “Ka hmachawn chak ber chu Lennox Lewis a ni a, ani nen hian Britain-a boxer tha ber zawng tura Wembley Stadium-a inhnek ka chak hle,” a ti.