21 May 2020 09:47

bakteaJr.

Mizo tlangval

​AJ-a lakah Pulev inhnukdawh a tum lo

Bulgarian heavyweight boxer Kubrat Pulev chuan Anthony Joshua-a’n Tyson Fury a hmachhawn duh avang ringawta inhnukdawh a tum loh thu a sawi.

Pulev hi AJ-a title kawl lai pakhat IBF title mandatory challenger a ni a, anni pahnih hi June ni 20-a inhnek tura ruahman ni mahse coronavirus buai avanga sawn a ni.

Pulev leh AJ-te hi kum 2017 khan inhnek tur an ni a, mahse Pulev hi a inhliam avangin a inhnukdawka, a vawi hnih nana inhnukdawh a tum lo hle.

AJ hian tunah hian heavyweight division-a world title pali awm zinga pathum IBF, WBA leh WBO world title te a kawl meka, Pulev hi sawi angin mandatory challenger ni mahse heavyweight title dang awm chhun pakhat kawltu Fury chu AJ nen hian undisputed champion zawnaa inhnek tura sawi an ni nasa hle.

Nikum khan AJ hian Andy Ruiz hneh lovin, a title pathum te hi a hloh veka, mahse nikum kum tawp khan intum nawnin, AJ hian a title hi a la kir leh vek. AJ-a’n Ruiz a hneh loh hian Pulev hi mandatory challenger a ni tawha, mahse AJ hian rematch a duh avangin Pulev hi Ruiz hmachhawn lovin a lo inhnukdawk tawh.

AJ hian Pulev a hmachhawn phawt a ngaih ang chiah hian Fury pawh hian Deontay Wilder a hmachhawn ve leh phawt a ngai a, an pahnih hian undisputed heavyweight fight an nei duh a nih chuan an hmachhawn tur pahnih hi an hneh ve ve phawt a ngai.

Pulev chuan inhnuhdawh a tum loh zia sawiin, “Kan inhnek hun tur sawn a ni reng chhan hi ka hrethiam lova, a hun tur leh hmun tur tihfel a, hmalak mai a hun tawhin ka hria a, he fight-a hnehna chan hun hi ka nghakhlel tawh a ni.

“Miin min hmachhawn hlau a, midang hmachhawn dan phet an zawng thin hi ka hrethiam lutuk a, mahse hei hi champion awm dan tur a ni lo.

“Nikum khan mandatory challenger ni tawh mah ila, AJ leh Ruiz-te’n rematch an neih theih nan ka hmun ka kian tawha, ken nawn leh tumna ka nei lo. Nikum pawh khan IBF dan kalh vekin thil an ti a, mahse keimah ka insiamrem tawh.

“Kum a lo vei leh tawha, kan inhnek hun tur sawn chhan tur hi an nei renga, min hmachhawn loh dan tur ngawt an ngaihtuah. Duhthlan tur pahnih chiah an nei a, min fight a nih loh chuan a title dah awl mai rawh se,” a ti.

Pulev hian a career-ah fight 29 nei tawhin, vawi khat chiah a la tlawma, a hneh loh awm chhun hi Wladimir Klitschko niin, AJ hian fight 24 nei tawhin, vawi 23 a chak ve tawh bawk a ni.