Amercian-Mexican heavyweight boxer Andy Ruiz chuan Anthony Joshua nena rematch an neih huna, British boxer Aj-a career chu tihtawp sak ngei a tum.

Kumin June ni khat khan heavyweight boxer pahnihte hi an lo inbei tawh a, Ruiz hian AJ hi Madison Square Garden-ah a knock-out a, tunah hian WBA, IBF, WBO leh IBO world heavyweight title-te a kawl mek.

Kumin kum tawp December ni sarihah Ruiz leh AJ-te hi an inbei leh dawn a, middle-east lamah inhnek dawnin, Saudi Arabia chuan he inhnek ropui hi a thleng dawn.

Ruiz chuan AJ nen an inhnek leh tur chungchang sawiin, “AJ hi ka hneh tawh a, thlalera kan inhnek leh hunah a career tihtawp sak ngei ka tum. Kan inhnek hmasak khan histiory ka siama, Mexican-American heavyweight zinga world champion hmasa ber ka ni. Saudi Arabia-in an rama inhnek tura min sawm hi ka lawm hle a ni,” a ti.

Ruiz hian a world title kawl laite chu vawi khat chiah la tlawm AJ-a lakah humhim a tum dawn a, AJ hian a belt chhuhsaktu Ruiz chu hneha, a title kawl thinte lak kir ngei a tum bawk dawn.

He fight hian ngaihven a hlawh hle a, sum pawh a tam dawn. Boxer pahnihte an inpuahchah meka, an incho tawn bawka, inhnek hmuhnawm tak kumin kumtawpah kan hmuh ngei a rinawm a ni.