Khup hliam vanga chawl mek Bengaluru FC forward Daniel Lalhlimpuia chuan a dam chho mek tih a sawi a, inkhel thei tura dam vat a chak tih a sawi bawk.
India Under-19 Captain ni bawk Daniel-a hian khup hliam vangin chawlh a mamawh rih a, hei vang hian Bengaluru FC tan pawh season bul a tan thei lo.
Bengaluru FC hian tunkar Inrinni hian Rajiv Gandhi Stadium, Aizawlah Aizawl FC an hmachhawn dawn a, inkhel.com-in Aizawl FC hi a hmachhawn chak em ti a kan zawhna chhangin Daniel-a chuan, "A chakawm ve duh khawp mai. I-League khelh hi hunrei tak atang tawha ka chak a ni a, hliam ka nei hi pawi ka ti khawp mai. Tun dinhmunah chuan chawlh ka mamawh rih si a, ka hliam hi dam vat se inkhelh hlan ka nghakhlel tawh takzet," tiin a sawi.
Serchhip rawlthar Daniel-a hian kum 2007 khan Chandigarh Football Academy-a zawm a, hemi hnu hian AIFF hnuaiah a lut leh a AIFF Elite Academy-ah awm lehin India tan age level-ah pawh vawi engemaw zat a lo khel tawh thin a, goal pawh a khung thei hle nghe nghe a ni.
I-League Under-19 a Elite Academy lo champion pui tawhtu Daniel-a hian I-League match-a Bengaluru FC leh Aizawl FC inkhel tur pawh a thlir lawk a, "Kan club (Bengaluru FC) hian an game hmasa ber ang a an khelh theih chuan an chak ka ring," tiin a sawi bawk.