11 Dec 2015 05:47

Inkhel

Mizo Sports Website hmasa ber

Aizawl Marathon-ah ​Peka leh Rinchhani ten ro an rel

December 10.2015 a tlan zawh tak Aizawl Marathon 2015-ah Vanlalpeka, Ramthar, Lunglei chu pakhatna a ni a, 42.195 km chu darkar 2:49:12 chhungin a tlan thleng a, Half Marathon hmeichhiaah Lalrinchhani, Thenzawl Hockey Academy chu pakhatna a ni a, darkar 1:47:20 chhungin a tlan thleng ve bawk.

Mipa intlansiakah hian 2014-a pakhatna T.Malsawmkima chuan KM 40 zet mai hma a hruai a, amah hnaih bertu Lunglei Ramthar veng tlangval Vanlalpeka laka a hmahruaina chu minute 5 zet a ni. Mahse a ke a tihnat hlauh avangin Ngaizel pheiah Peka hian a lehpel a, Peka bakah K.Lalawmpuia pawhin a tlanpel bawk a ni.

Hmeichhiaa pakhatna Lalrinchhani chu Marathon lama tawn hriat la nei lo, Mizoram Womens Hockey player a ni a, Thenzawla Hockey Training-na hmuna awm mek a ni. Pahnihna Kroshmangaihsangi pawh Marathon lama tawn hriat la nei ngai lo a ni a, boxer niin Mizoram aiawha vawi engmawzat lo fehchhuak tawh leh National record tha tak nei tawh a ni a, tunah hian SAI Centre Mission Venthlangah a awm mek a ni.

Nimin zing dar 7:00 khan Aizawl Marathon hi Treasury Square atanga tlanchhuak tanin Ramhlun Road leh Bawngkawn an tlan tlang a, Falkland-ah World Bank Road pawhin Melriat an tlan thleng a, heta tang hian Kulikawn lamah tlanletin Lammualah an tlanlut ta a ni. Hmeichhiaten Half Marathon an tlan ve bawk a, heng tlanchhuakte hi Pu Zothankhuma, Secretary, Sports Department chuan a vailiam. Lawmman semna hun hi Sipai Lamualah chawhma dar 10:30-ah neih a ni a, hetah hian Pu Hmingdailova Khiangte, Parl.Secy chu khual lian a ni a, intihsiakna chi hrang hranga lawmmante a sem a. Aizawl Marathon 2015-ah hian mipa 120 tlanin half marathon hmeichhiaah 26 an tlan a, sawrkar department hrang hrang inelna Health & Fitness Run tlan a ni bawk a, hetah hian Treasury Square atangin Aizawl hmar lamah bawk an tlanchhuak a, Chanmari Biakin helin an tlan kir a, Lammualah an tlanlut a, department hrang hrang 10 atangin mi 350 an tlan.

Health & Fitness Run-ah hian Home Department (Mizoram Police) chu pakhatna niin an tlan tam ber a, pahnihna Sports & Youth Services Department niin Revenue Department chu pathumna an ni. PWD, I&PR, Social Welfare, Vety, School Education leh UD&PA department atangin mi engemaw zat an tlan bawk a ni.

Aizawl Marathon 2015 result 1. Vanlalpeka, Ramthar, Lunglei - 2:49:12 hrs 2. K.Lalawmpuia, Venghlun, Lunglei - 2:52:39 hrs 3. T.Malsawmkima, Thingsen, Saiha - 3:01:11 hrs. Pakhatnain Rs. 50000/- leh Certificate a dawng a, pahnihin Rs.30,000/- leh certificate, pathumnain Rs. 10,000 leh certificate dawngin palina atanga sawmna te hnenah consolation prrize Rs.1000 theuh hlan an ni bawk. Half Marathon result 1 Lalrinchhani, Thenzawl Hockey Academy - 1:47:20hrs 2.Kroshmangaihsangi, SAI, Aizawl - 1:48:07 hrs. 3. K.Lalngaihpari, Durtlang 1:52:18 hrs.

Pakhatnain Rs.30,000/- leh certificate, pahnihnain Rs. 10,000/- leh certificate, pathumnain Rs.5000/- leh certificate an dawng a. Mipa ang bawkin palina atanga sawmna te hnenah consolation prize Rs.1000 theuh hlan an ni a, tlan thleng zawng zawngte hnenah certificate pek an ni bawk.

Aizawl Marathon neih a nih hma hian thingtlang khaw 8-ah aitechhinna, Half Marathon buatsaih a ni a, hetah hian record pawh an nei tha zawk hle. Buatsaihtu Organising Committee-a technical chairman Pu H.Thangchungnunga, SPO chuan Aizawl khawpui chhunga harsatna an tawh thu sawiin traffic tawt avangin duhthalin Marathon-a telte an tlan thei lova, traffic tibuai lo thei ang bera thil tih a ngaih si avangin an tlan hun chhung pawh a rei a, tin, tlankawng a chhuk-chho bawk nen record a tha tawk thei lo a ni a ti. Aizawl Marathon hi buatsaih tum zel a nih avangin hetiang hun rei lo te chhung hi chu khawpui danga an tih angin kan motor-te pawh dintir ni thei se tih hi kan duhthusam a ni. Marathon kher lo, ke a kal hrim hrim pawh Aizawl mipuite hian hriselna atan kan mamawh a, hrisel lohna avanga inenkawlna sum tam tak kan sen thin dan kan hria a, infiamna hi tuipui ila, insawizawiin kein kal tam ila tiin chutiang rilru pu tel chung chuan he Marathon pawh hi buatsaih a ni a ti.