April ni 22, 2017 (Inrinni) chawhnu dar 2:00 hian Rajiv Gandhi Stadium-ah Hero I-League 2016/17 season final Aizawl FC leh Mohun Bagan te chuan an khel dawn a, he match hi champion leh champion loh hriltu a nih avangin India ram chuan Mizoram a thlir thup mek a ni.
A chak zawk zawk an champion dawn
Khelh 16 atangin Mohun Bagan leh Aizawl FC hian 33 points an nei ve ve a, Bagan home-ah Aizawl FC an tlawm avangin head-to-head ah Bagan an tha zawk, league hmahruaitu an ni mek. RG Stadium-ah hian team hnihte hi an inhnehtawk a nih chuan Mohun Bagan tan champion-na kawng a inhawng dawn tihna a ni.
Tin, Bagan hi si khat fai emaw tala an chak a nih pawhin an champion chhunzawm tawh dawn bawk. Aizawl FC tan chuan champion nghal tur chuan 2-0 tala an chak a ngai a. Hnehna an chang hrim hrim a nih pawhin champion turin an dinhmun a tha dawn hle a, hetih lai hian an match hnuhnung berah Shillong Lajong FC an hmachhawn dawn, draw chiah an mamawh tawh ang, hetih lai hian chak lo thei an ni ve tho a. Aizawl FC hian an mualah hian si hnih fai tala chaka, champion an tum dawn a ni.
Home record nei tha Aizawl FC
Tun season Hero I-League ah Aizawl FC hian anmahni mual Rajiv Gandhi Stadium-ah hian hneh loh an la tawng lova, game 8 khel tawhin vawi 7 an chak a, Bengaluru FC chiah an inhnehtawkpui, chutiang khawp chuan home record an nei tha a ni.
Aizawl FC hian away lamah pawh ball an chang hnem thin hle a, an home match stats lam lo en ta ila. Inkhelh apiangin ball chang tam zawk an ni ziah a, average ball possession 55% an nei. Shots phei chu an ngah hle a, game 8 atangin shots vawi 104 zet an nei a, match tin shots vawi 13 an nei ziah ang a ni.
Game 8 atangin shots on target vawi 42 an nei a, match tin shots on target vawi 6 vel nei ziah ang an ni. Tin, game 8 atangin corner vawi 49 an hlawhchhuak a, match khatah corners vawi 7 vel hlawhchhuak ziah ang an ni.
Rajiv Gandhi Stadium-ah hian Aizawl FC hian game 8 atangin goal 12 an khung a, goal 3 chiah an chhuah. Home game vawi 8 atangin Aizawl FC hian points 22 an hlawhchhuak thei a ni.
An lo inhmachhawn tawhnaah Bagan an chungnung zawk
Aizawl FC hi India Top Flight-ah season hnih an inlanna chiah a ni a, India club hlun Mohun Bagan nen hian vawi 4 an inhmachhawn tawh a, Bagan hi vawi 3 chakin Aizawl FC hi vawi khat chiah an la chak a ni.
Season hmasa khan Bagan home-ah Aizawl hi 3-1 in an tlawm a, Rajiv Gandhi Stadium-ah erawh 2-1 in an chak thung. Nikum March ni 26, 2016-a RG Stadium-a an inhmachhawn tum khan Joel Sunday chuan tan atanga minute 3-na lekah goal a khung a, he goal hi Glen chuan 24 mins-ah a rul. Second half 56 mins-ah Chhawnkima chuan Aizawl FC chakna penalty atangin a khung a ni.
Team hnihte hi May ni 21, 2016 khan Federation Cup final-ah an inhmachhawn. Kha match-ah erawh 5-0 laiin Bagan kha an chak a. Tun season I-league ah Aizawl FC hian Bagan hi an tlawh tawh a, 3-2 in Bagan an chak hram. Kha match-ah khan Aizawl FC an vanduai hle, Duffy chuan 2 mins-ah goal hmahruai khung mahse 41 mins-ah Jayesh Rane chuan a rul a. Jeje chuan 63 mins-ah Bagan hma hruaipui leh mahse 70 mins-ah Ashutosh chuan Aizawl FC siphurh a rul. Point khat an hlawhchhuak dawn nia a lan laiin hun tawp dawn minute 6 a la awm tihin Duffy chuan penalty atangin chakna goal a khung ta a ni.
Mohun Bagan lamah goal a khung theih
Mohun Bagan hi India club lian leh hlun an ni tih kan sawi ngun, tunah chuan Aizawl FC nen kan khaikhin ta reng mai, hei hi Mizoram tan chuan chanchin lawmawm tak a ni chiang e. I-League-a Aizawl FC-in Bagan an hmachhawn apiangin goal an la khung ve ziah a. Season hmasa leh tun season-ah Bagan home-ah Aizawl FC hi vawi hnih an khel tawh a, goal 3 an khung thei. Rajiv Gandhi Stadium-ah Aizawl FC hian Bagan hi vawi khat an mikhual tawh, goal 2 an khung tawh bawk a ni. Heta tanga lang chiang em em chu, Mohun Bagan hian goal khung thei mahse an goal an venghim hleithei bik lo tih hi a ni.
Rajiv Gandhi Stadium-a inkhelh harsa an ti
Tun season-a Aizawl FC-in home record an neih that em emna chhan pakhat chu supporter tha an neih vang a ni a. RG Stadium-ah hian Hero I-League club hnehna chang tun season-ah an la awm lo, Rajiv Gandhi Stadium-a inkhelh hi harsa an ti hlawm em em a ni. Mohun Bagan pawh season hmasa khan an tlawm reng a nih kha.
Tin, he ground hi artificial turf hmanna a ni a, natural grass-a khel char char thin club dangte'n artificial turf-a inkhelh hi harsa an ti hle a, chu chu RG Stadium-a club dang an chet that theih lohna chhan pakhat a ni kan ti ve thei bawk awm e.
Team hnih ten attacking football an khel dawn
Football-a match en ninawm ber pakhat chu goal humhim tum game hi a ni kan ti thei awm e. Tun inrinni match-ah erawh a tu zawk zawk pawh hian chak an tum dawn, Rajiv Gandhi Stadium-a champion nih an tum ve ve dawn. Chuvang chuan goal khung tumin theih tawpin an innawr dawn a ni.
Mohun Bagan hi hmatawng neitha team an ni. Tun season-ah goal 25 lai an khung tawh. Mizo tlangval Jeje Lalpekhlua an nei, Katsumi, Norde leh Duffy te hian Aizawl FC tlar hnung an su tlang thei angem? Balwant hi a duk leh pur pur angem? Bagan hian player naupang tha zet Mallick an nei, Kolkata Derby-ah pawh ropui taka a chet hnuah goal mawi lutuk box pawn atangin a khung a nih kha. Ruatthara line-ah an dah a nih chuan Mallick leh Ruatthara inhmachhawn a hmuhnawm khawp ang le.
Bagan hian tlar hma lamah chuan duhthlan tur a nei, India striker tha ber ni mek Jeje-a pawh bench-a thuttir thei kha an nih miau avangin Rajiv Gandhi Stadium-ah hian goal an khung ngei a rinawm.
Hetih lai hian Aizawl FC hi midfield nei tha an ni ve thung a. Alfred, Jayesh Rane leh Amna te an inkawp leh ngei ang. Anni pathum hi Aizawl FC midfield tikhawngtu leh Aizawl FC game tidanglamtu an ni thin. Away-ah pawh game mawi tak Aizawl FC in an khelh theihna chhan an ni kan ti thei bawk awm e.
Tin, Kamo hi season tir lamah a form lo em em a, season tawp lamah erawh a che bon hle, Danmawia leh Brandon te a sirah an awm leh ngei a rinawm bawk a. Aizawl FC hian an home hi an hman thiam em avangin hnehna chang thei tur pawhin theihna an nei a ni.
Prediction i tih duh chuan hetah hian click rawh : Click here