Aizawl FC leh Neroca FC an inhneh tawk

07th November 2018, 11:11PM

November ni 7, Nilaini tlai Rajiv Gandhi Stadium Mualpuiah Aizawl FC chuan I League Home match hmasa ber Neroca FC an mikhual a, goal lut awmlo in an inhneh tawk a, point khat ve ve an hlawh chhuak. He inkhelah hian Neroca FC midfielder Malemnganba Meitei chu Hero of the match-ah thlan a ni. 

Aizawl FC hian match thum khel tawhin point 2 an nei a, table-ah pakua na an ni mek. Neroca FC hian match thum bawk khel tawh bawkin point 2 an nei ve bawk a, table-ah sawmna an ni ve mek bawk.

02:00 PM Aizawl FC 0-0 Neroca FC

Aizawl FC XI: Govin Singh, Bektur Talgat Uulu, Lalkhawpuimawia, Albert Zohmingmawia, Kareem Omolaja, Alfred Kemah Jaryan, Gurpreet Singh, Lalrinfela, Ghanefo Ansumana Kromah, Hmingthanmawia, Vanlalduatsanga.

Neroca FC XI : Mauro Boerchio, Eduardo Soares, Varney K Kallon, Ashok Singh, Shaikhom Ronald Singh, Jerry Onesemas, Felix Odili Chidi, Malemnganba Meiteo, Sebastian Thangmuansanga, Aryn Glen Williams, Biakliana.

Inkhel tan a ni a, Aizawl FC chuan inkhel thunun zawkin goal thunna hun tha an nei nghal a, mual veilam sir a tang a Vanlalduatsanga ball vawrh luh tha zet chu box chhunga awm Kromah chuan goal sirah chiah a pet a, Lalrinfela corner pet tha zet chu Khawpuimawia chuan goal sirah a pet bawk.

Neroca FC pawhin goal thunna hun tha nei ve bawkin box chhung chiah a tang a Odili Chidi shot tha zet chu Aizawl FC keeper Gurpreet Singh chuan a dan sak a, Onesamas leh Ronald Singh chuan an hun tha neih an hmang tangkai thei lo bawk.

First half huntawp dawnah Aizawl FC chuan goal thunna hun tha neiin Albert Zohmingmawia corner pet chu box chhunga awm Alfred Kemah Jaryan chuan a pet goal ngei dawn nia a lan laiin Neroca FC keeper Mauro Boerchio chuan a dan sak a, Kareem Omolaja free kick tha zet chu Neroca FC keeper Mauro Boerchio chuan a dan sak bawk. Goal lut awmlo in chawlh lawk an hmang zui ta a ni.

Second half-ah Aizawl FC chuan goal thun ngei tumin coach Gift Raikhan chuan forward Dodoz, defender Lallawmawma leh Midfielder David Rinmuana te lut tirin an goal bawh na sawt mahse, Neroca FC chuan goal thunna hun tha an nei hmasa zawk a, Malemnganba Meitei leh Odili Chidi chuan an hun tha an hloh a, Jerry Onesemas chuan Aizawl FC keeper Gurpreet Singh chiah a hmachhawn hnuah Gurpreet Singh chuan a dan sak.

Aizawl FC chuan goal thun ngei tumin counter attack-in an nawr a, mual veilam sir a tang a Dodoz ball vawrh luh tha zet box chhunga awm Kromah chuan a tauh goal ngei dawn nia alan laiin Neroca FC keeper Mauro Boerchio chuan a dan sak a, box pawn chiah a tang a Khawpuimawia shot tha zet chu goal sirah chiah a kal zui bawk.

Huntawp dawnah Aizawl FC chuan goal thunna hun tha neiin David Rinmuana freekick tha zet chu box chhunga awm Hmingthanmawia chuan a tauh goal dawn nia alan laiin Neroca FC keeper Mauro Boerchio chuan a dan sak a, goal lut awmlo in hun atawp zui ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.