09 May 2015 04:43

digimalt

​Aizawl FC leh match fixing ?

May ni 6, 2015 Nilaini khan Aizawl FC chuan I-League 2nd Division-a Round 13-ah 4-2 in Mizoram club tho Chanmari FC an hneh. League hmahruaitu Aizawl FC hnaih ber tur Lone Star Kashmir FC erawhin an khingpui Kenkre an draw pui ta si a, Round khat la awm mahse Aizawl FC chu I-League 2nd Division champion an ni ta a, I-league-ah an inpet kai ta.

Siliguri-a an hneh loh Chanmari FC 4-2 a Aizawl FC in an hneh leh tak avang hian I-League 2nd Division club Mohammedan S.C. chuan AIFF hnenah zualkovin, Aizawl FC leh Chanmari FC match kha fixed a ni e tiin thu an thlen. He complaint hi May ni 7, 2015 khan Mohammedan S.C chuan AIFF hnenah thehlutin, hetia thehluh hi duhtawk mai lovin media-ah nasa takin an ti darh bawk a.

Inkhel.com chuan Mizoram Football Association honorary secretary Pu Lalnghinglova Hmar kan be nghal a, ani chuan,"Hetianga complaint thehluh hi kum dangah pawh a lo thleng zauh zauh tawh thin a. Mahse Aizawl FC leh Chanmari FC te hian kha match kha an fixed ka ring lo. Aizawl Club inhal tak pahnih an ni a, Mizoram atanga I-League khel hmasa zawk nih inchuh an nih avangin Chanmari FC tan chuan Aizawl FC luh ai chuan luh loh ve ve an thlang hial zawk maithei a ni tih vel chu a ni. Hetiang match fixing lam hi chu Mizoram Football-ah a awm ve ngai lo. Chuvang chuan AIFF-ah pawh complaint thehlut mahse kha match kha an en let anga, match fixing a awm loh zia AIFF chuan a hre mai ang," tiin a sawi.

Pu Tetea Hmar sawi ang tak chuan Mohammedan SC-in AIFF hnena complaint an hnehluh chu hnawl a ni tih vawiin la la khan puan a ni nghal a. Aizawl FC President chuan Official Facebook Page-ah thuchhuah siamin,"Aizawl FC leh Chanmari FC match chungchanga match fixing awm anga Mohammedan SC-in AIFF hnena complaint a thehluh chu AIFF chuan video ngun taka a en hnuah a hnawl ta a ni," tiin.

A complaint from mohammedan sc about aizawl fc and chamari fc match was rejected by AIFF. President of Aizawl FC was...

Posted by Aizawl FC on Thursday, May 7, 2015

Mizoram Premier League-ah Aizawl FC an khel chhunzawm zel dawn em ? Tih inkhel.com in a zawhna chu Pu Tetea Hmar chuan,"Khel chhunzawm dawn tehreng e. Tuna I-League club te pawh khuan an state chhunga league an khel tho a, Aizawl FC pawhin Mizoram Premier League an khel chhunzawm ang.

"Hetih lai hian 2015-16 I-League khelh hun tur hi kan la hre lova. AIFF in an puan chian hunah MPL calendar pawh chumi zulzui deuh chuan neih kan tum anga. Amaherawh chu AIFF hian a hun tak an puang vat thei lo a nih a, MPL leh I-League a ruala neih a nih pawhin harsatna a awm ka ring lo. Aizawl FC inkhelh hun kan schduled mai dawn a ni," tiin a sawi.

Aizawl FC hian khawi Ground nge home-ah an hman dawn tih zawhna chu Pu Tetea Hmar chuan,"I-League 2nd Division pawh khelh zawh a la ni lova. Hemi chungchang hi chu a la hmanhmawhthlak loh. Mizoram chhungah ngei Aizawl FC hian home game an khel ngei ang. Hetih lai hian AIFF hian criteria thar an nei nual a, kan ground te an rawn endik anga, chu erawh AIFF lam thutlukna a ni ang. Mahse Shillong-ah pawh ground tha lem lovah pawh khelh a ni fova. Chuvang chuan Mizoram chhung ngeiah Aizawl FC hian home game an khelh ka ring a ni." tiin a sawi.