October ni 17, Nilaini khan Mc Dowell's No 1 Soda Mizoram Premier League (MPL) Season 7 Round 8 match hmasa ber AR Lammualah kai thar Chawnpui FC leh I League Club Aizawl FC te inkhelah chak zawk awmlo in 1-1 in an inhneh tawk a, point khat ve ve an hlawh chuak. He inkhelah hian Chawnpui FC defender Lalthlamuana chu Man of the match-ah thlan a ni.
Team pahnih te hi Round 5-ah inhmachhawn tawhin chak zawk awm lo in 2-2 in an inhneh tawk a, an intawn vawi hnihnaah pawh chak zawk awmlo in an inhneh tawk leh bawk. Aizawl FC hiah point 13 neiin pathumna an nih chhunzawm a, Chawnpui FC hian point 8 neiin parukna an nih chhunzawm bawk.
Goal lut te hi first half leh second half a lut an ni a, first half-ah Chawnpui FC tan Vanrammawia goal hmahruai khung chu second half hun tawp dawn injury time-ah Chawnpui FC keeper Thomas Lalthlamuana chuan an lamah a ti goal a, Aizawl FC chuan an siphurh an rul.
05:30 PM Chawnpui FC 1-1 Aizawl FC
(Vanrammawia Ngente 44') (Thomas Lalthlamuana (OG) 90+2')
MoM: Lalthlamuana, Chawnpui FC
Aizawl FC hian foreigner Liberian striker Ansumana Kromah chu inhliam avangin an chhawr thei lo a, Bektur Talgat Uulu erawh second half-ah a inlan a, inkhel tan atangin Aizawl FC chuan inkhel an thunun zawk a, goal thunna hun tha pawh an nei hmasa zawk. F. Lalremsanga leh Isak Vanlalruatfela ten box pawn chiah a tang a an shot tha zet chu Chawnpui FC keeper Thomas-a chuan a dan sak ve ve.
Chawnpui FC winger Vanlalthanga mual veilamah a che a hmuh nawm hle a, Vanrammawia Ngente leh K. Roluahpuia (K. Mama) tan ball tha pe thin mahse Aizawl FC tlarhnung an thiat thei lo.
Goal lut lo in first half an hmang zo dawn emaw tih hnu huntawp nan minute 1 ala awmin Aizawl FC defender Hmingthanmawia (Valpuia) leh Rinchhana ball inpek sual nangchinin Chawnpui FC striker Vanrammawia Ngente chuan Aizawl FC keeper Lalremruata (Arem-a) dinglam sirah mawi takin apet goal a, Chawnpui FC chuan 1-0 a hmahruaiin chawlhlawk an hmang zui ta a ni.
Second half-ah Aizawl FC chuan an siphurh sut ngei tumin Coach Gift Raikhan chuan foreigner player Bektur Talgat Uulu leh Rochharzela rawn luh tirin an goal nawr a na sawt a, mual veilam sir a tang a, F. Lalremsanga ball pek tha zet chu box Chhunga awm Khawpuimawia shot leh Paul Ramfangzauva freekick pet tha zet chu Chawnpui FC keeper Thomas-a chuan a dan sak ve ve.
Chawnpui FC pawhin goal thu belhna hun tha neiin K. Roluahpuia (K. Mama) leh Vanlalthanga chuan an hun tha neih an hloh ve ve bawk. Chawnpui FC chuan 1-0 in hnehna an chang tawh dawn emaw tih hnu huntawp dawn injury time-ah Aizawl FC defender Rinchhana'n mual veilam sir a tang a ball vawrh luh tha zet chu Chawnpui FC keeper Thomas-a chuan an lamah a nam goal zui a, Aizawl FC chuan an siphurh an rul. Chak zawk awmlo in khelmual an chhuah san ta a ni.
(adsbygoogle = window.adsbygoogle || []).push({});