Mc Dowell's No 1 Soda Mizoram Premier League (MPL) Season 7 round 6 match hnuhnung ber October ni 5, Zirtawpni zan I league Club Aizawl FC leh kai thar Chawnpui FC inkhelah chak zawk awmlo in 2-2 in an inhneh tawk a, He inkhelah hian Aizawl FC forward F. Lalremsanga chu Man of the match-ah thlan a ni.

First half-ah Chawnpui FC tan David Laltlansanga hmangin goal hmahruai an khung a, Aizawl FC tan F. Lalremsanga chuan an siphurh a rul. Chawnpui FC tan Vanlalthanga chuan an goal hnihna a khung chu second half-ah Aizawl FC tan Khawpuimawia chuan an siphurh a rul.

Aizawl FC hian Electric Veng FC an hneh loh hnuah Chanmari FC an draw a, Mizoram Police FC hnehin Chhinga Veng FC an draw leh a, Ramhlun North FC hnehin Chawnpui FC an draw leh a, khelh rukah point 9 nei tawhin table-ah palina an hauh mek a ni.

Chawnpui hian Chhinga Veng FC an hneh loh hnuah Ramhlun North FC, Electric Veng FC leh Bethlehem Vengthlang FC an draw a, Chanmari FC hnehin Aizawl FC an draw a, khelh rukah point 7 nei tawhin table-ah panga na an hauh ve mek bawk.

07:00 PM Aizawl FC 2-2 Chawnpui FC

(F. Lalremsanga 29', Lalkhawpuimawia 47') (David Laltlansanga 25', Vanlalthanga 45+2')

MoM: F. Lalremsanga, Aizawl FC

Inkhel tan a ni a, team pahnih te an innawr tawn zak zak hnuah Chawnpui FC chuan an hun tha neih hmang tangkai hmasa zawkin minute 25-ah David Laltlansanga chuan an hmahruaina goal khung chu minute 4 aral hmain Aizawl FC tan F. Lalremsanga chuan an siphurh a rul.  Aizawl FC chuan goal thun belhna hun tha neiin Isak Vanlalruatfela ball vawrh luh chu box chhunga awm Vanlalduatsanga chuan goal kham a tauh per a, box pawn chiahn a tang a Rochharzela shot tha zet chu Chawnpui FC keeper Malsawma chuan a dan sak.

Chawnpui FC pawhin goal thun belhna hun tha nei ve bawkin box pawn a tang a, K. Mama shot tha zet leh Vanlalthanga shot tha zet chu Aizawl FC keeper Gurpreet Singh chuan a dan sak. Goal luh belh lo in hun chanve an hmang zo dawn emaw tih hnu injury time-ah Chawnpui FC tan Vanlalthanga chuan halfway line bul chiah atangin mawi takin an goal hnihna a khung a, Chawnpui FC chuan 2-1 a hmahruaiin chawlh lawk an hmang zui ta a ni.

Second half-ah Aizawl FC insiam tha in Minute 47-na lekah Joe Zoherliana corner pet chu buai deuh nuai karah Khawpuimawia chuan pet goal-in an siphurh a rul. Aizawl FC chuan inkhel thunun chhunzawmin goal thun belhna hun tha Khawpuimawia chuan nei mahse a hun tha neih a hmang tangkai thei lo.

Minute 82-ah Aizawl FC defender Hmingthanmawia hnawh chhuah ni mahse Aizawl FC erawh an buaiphah lo. Chawnpui FC chuan hnehna chan ngei tumin counter attack-in an nawr let a, Vanrammawia Ngente leh David Laltlansanga chuan clear chance an nei thei bik lo a, goal luh belh tawh lo in 2-2 in an inhneh tawk a, point 1 ve ve an hlawh chhuak ta a ni.

Round 7 hi October ni 12 Zirtawpni leh October ni 13, Inrinniah Serchhip-ah khelh tur a ni a,  football ngaina tu te a hmun a en turin kan insawm nghal a ni. 

(adsbygoogle = window.adsbygoogle || []).push({});