Rajiv Gandhi Stadium-ah Aizawl FC chuan Bengaluru FC an mikhual a, team hnihte hi 1-1 in an inhnehtawk a, point khat ve ve an hlawhchhuak a ni.
Aizawl FC tan Brandon VL Remdika chuan 40 mins-ah goal a khung a, first half tawp dawn tak takah Sunil Chhetri chuan box pawn atangin mawi takin a thuai lut a, 1-1 in an inhnehtawk ta a ni.
Aizawl FC hian game 9 an khel tling ta a, point 17 hlawhchhuakin Hero I-League table-ah pathumna an ni chhunzawm zel. Champion lai Bengaluru FC chuan khelh 8 atangin point 12 an nei a, Aizawl FC hnuai chiahah an awm.
Aizawl FC 1-1 Bengaluru FC
(Brandon 40') (Sunil Chhetri 45')
Aizawl FC XI : Albino, Kingsley, Zotea, Amna, Jayesh, Alfred, Chullova, Brandon, Kamo, Ashutosh, Ruatthara
Bengaluru FC XI: Amrinder, Lenny, Khabra, Sunil Chhetri, Eugeneson, Sandesh Jhingan, John Watson, Sena, Udanta, Salam Ranjan, Daniel
Goal hi first half tawp dawna lut ve ve a ni a, Kamo chuan mual dinglam sirah Ashutosh tan ball tha tak a pe a, Ashutosh chuan box chhunga tlan lut mek Brandon VL Remdika tan lei hrulah tha takin a cross, Brandon chuan chiang set sawtin a pet goal ta a ni.
Goal a luh atanga minute nganaah Bengaluru FC chuan an siphurh Sunil Chhetri hmangin an rul a, box pawn atangin mawi takin Chhetri hian a thuai lut a, an inhnehtawk ta a ni. He match-ah hian Bengaluru FC chuan penalty an thelh a, second half 55 mins-ah Ruatthara chuan box chhungah Sandesh Jhingan a ti tlu, referee Rowan Arumughan chuan penalty a ham. He penalty hi Sunil Chhetri chuan petin; Aizawl FC goalkeeper Albino chuan a lo dang a, tun season-ah Albino hian penalty vawi hnih a save ta a ni.
Goal mouth action a awm nual a, Al Amna chuan box pawn atangin a tauh, Bengaluru FC goalkeeper Amrinder chuan a ban phak lo chiah chiah, mahse a goal tur cross bar-in a lo dang. Hemi per hi Alfred chuan a pet chhunzawm a, Amrinder chuan tha zetin a lo dang hman a ni.
Sunil Chhetri a che tha hle a, goal khung theihna chance a nei nual, second half-a Khabra cross tha zet chu a tauh goal teuh hle a, Albino chuan a lo dan sak a, Bengaluru FC tan Sandesh Jhingan chuan set piece atangin tauh goal mahse goalkeeper laka an foul avangin referee chuan goal-ah a pawm lo. He match-ah hian Aizawl FC goalkeeper Albino chu Hero of the Match-a thlan a ni.
Second half hun tawp dawn lamah Aizawl FC tan Kamo chuan chance tha zet a thelh a, box dinglam sir atanga Danmawia tauh per chu Kamo chuan hnai set sawt atangin a tauh thelh, tauh fuh ngat selang chuan a goal chiang khawp ang le.
Match official te an che tha tawk lova, out leh out lo chungchangah tihsual an neih nual bakah corner chungchangah pawh tihsual an nei nual bawk. Aizawl FC penalty chawi dan pawh a ho lam hle niin a lang, chutiang bawkin Alfred-a handball avangin Aizawl FC in penalty an chawi ngei dan nia a lan laiin referee chuan a ham lo bawk. Bengaluru FC goal khung pawm sak an nih loh chungchangah pawh away team an lawm lo hle bawk a, coach-te ve ve referee thutlukna chungchangah an lawm lem lo ve ve a ni.
