15 Nov 2015 08:16

Inkhel

Mizo Sports Website hmasa ber

​Aizawl FC lakah Dinthar FC an comback ropui

McDowell's No 1 Soda Mizoram Premier League Round 11-na match hnuhnung berah hmahruaitu Aizawl FC leh Dinthar FC te 3-3 in an inhnehtawk. Aizawl FC tan Valpuia, Biaktea leh Alfred ten goal an khung a, Dinthar FC goal thum hi Samuel Lalthlanthanga khung vek a ni.

Aizawl FC hi semi final lut tawh an ni a, an match hnuhnung berah Luangmual FC nen 1-1 in an inhnehtawk a, hei vang hian an match dawt leh chu chak an tum ruh hle. Mahse Samuel-a an dang zo lova, Samuel Laltlanthanga chu tuma chuh phah lohva Man of the match-a thlan a ni.

Khelh 11 atangin Aizawl FC chuan 26 points an nei a, pahnihna Chanmari FC lakah point 6 in hma an hruai mek. Luangmual FC an chak loh laiin Dinthar FC erawh an khingpui an inhnehtawk pui hram a, 14 points neiin semi final khel thei dinhmunah an la ding mek.

Aizawl FC 3-3 Dinthar FC

(Valpuia 32', Biaktea 36', Alfred 65') (Samuel 45', 55'pen, 71')

Aizawl FC XI: Zothanmawia, Lalramchullova, Immanuel HS Lalthazuala, Lalthakima, Lalruatthara, Brandon VL Remdika, David Lalrinmuana, Lalbiakhlua, H. Lalbiakthanga, F. Lalrinpuia, Alfred Kemah Jaryan.

Dinthar FC XI: Vannunmawia, Lalfelpuia, Lalruatdika Pautu, Tlangthanpuia Ralte, Chhanrinpianga, Vanlalthanga, H. Lalhlimpuia, Lalmuansanga, Lalramliana, Samuel Laltlanthanga, Lalkhawpuimawia.

Dinthar FC-in bul an tan tha a, inkhel pawh an thunung zawk. Minute 10 chhungin goal khungna chance tha zet an nei a, Chhanrinpianga shot chu T Mawia chuan a lo dang hlauh mai. Goal hmasa ber hi 32nd mins-a lut a ni a.

Dinthar FC hian minute 4 chhungin goal hnih an chhuah a, 32nd mins-ah goal hmasa ber Valpuia chuan a khung a, a hnu minute 4-ah Biaktea chuan Aizawl FC goal hnihna a khung leh. Heng goal hnih luh chhan hi Dinthar FC defender Lalhlima tihsual ve ve kan ti thei awm e.

Alfred-a tauh per chu Lalhlima chuan a rawn clear dawn emaw tih laiin a rawn pet thelh chiang hle, chu chu awlsam takin Valpuia chuan goal-ah a chhuih lut a. 36th mins-ah Lalhlima back pass chhe zet chu Biaktea chuan a la a, cool takin a pet goal chhunzawm bawk. Si hnih faiin first half-ah Aizawl FC an chungnung dawn emaw tih laiin hun tawp dawnah Samuel-a chuan Dinthar FC tan goal khat a khung hlauh.

25 yards vel atangin Samuel Laltlanthanga chuan free kick ropui tak a pet a, top corner-ah T Mawia ban phak lohvah mawi takin a chhuih lut. Half time a nih chuan 2-1in Aizawl FC chuan hma an hruai a.

Second half-ah goal thum kan hmu leh a, 55th mins-ah penalty atangin Samuel-a chuan Dinthar FC si phurh a rul, mahse hemi hnu minute 10-ah Alfred-a chuan Aizawl FC hma a hruai pui leh a. 71st mins-ah Samuel-a bawk chuan Dinthar FC si phurh rul lehin, hattrick a siam ta a ni.