​Aizawl FC inpet tlinna I-League bihchianna

08th January 2016, 04:01AM

January ni 9, 2016-a tan tur I-League 2016 hi May 2016-ah zawh a ni ang. Season liamtaa team 11 telna I-League chuan tun season 2015-16 ah team 9 chauh a nei dawn ta. Dempo SC an relegate a, Pune FC, Bharat FC leh Royal Wahingdoh-te an inhnukdawk a. Tling thar DSK-Shivajians leh Aizawl FC telin club 9-in champion nomawi an inchuh tawh ang. Season tawpah team pakhat a relegate bawk ang.

I-League hi ONGC I-League hming puin kum 2007 khan tan a ni a, ONGC I-League hi kum 1996 a bultan National Football League tuaitharna a ni. A hming leh a kalphung thlak danglam niin tuna I-League kan tih tak hian Indian football-ah hmasawnna a thlen zawk beisei vang a ni.

Tun season-ah hian champion team-in Nuai 100 an dawng anga, season liamta champion Mohun Bagan khan nuai 70 an dawng a, nuai 30 laiin champion lawmman hi a pung a ni. Pahnihnain nuai 60, pathumnain nuai 40, palinain nuai 25. Match tina a chak zawk team-in cheng 50,000 an dawn belh theuh dawn bawk a ni.

Nikum lamah club tinin season tluana zin veivahnan nuai 40 an dawng a, hei pawh hi kuminah chuan nuai 45 a punchhoh a ni a. Match-day bik atan nuai 1 zel an dawng bawk ang.

Hetianga lawmman nasa taka AIFF in tihpun nachhan nia lang pakhat chu Club 3 an inhnuhdawh vang niin a ngaih theih. An inhnuhdawh nachhan ber chu I-League atangin sum lamah hlawkna an hmu lova, chuvang chuan an player leh coaching staff-te hlawh an inpe tha thei dawn lo nia an inhriat vang a ni ber mai.

Khawvel hmun hrang hranga top league-te hian TV broadcasting atanga an sum hmuh hi league sum sen phuhruk nan an hmang thin a. AIFF leh TV -a chhuahtute inbiakremna hi mipui hriat atana tarlan a ni chiah lo a, AIFF zawk hian TV channel-te hi an match chhuah turin pawisa an pe hial zawk nia sawi thawm tepawh a awm a. He thu hi finfiahna awm lo mahse TV broadcast atangin I-League kalpuina tur sum hlawm tham engmah a lut lo tih erawh a chiang hle a ni.

Tun season-ah hian Ten Sports nen an thawk ho leh a, 2015/16 season-ah hian match 72 khelh a ni dawn a, khawpui pasarihah I-League hi khelh a ni thin dawn. Hei vang hian Ten Sports Network chuan match zawng zawng hi an LIVE Telecast vek thei dawn lova, match zawng zawng 72 atanga a chanve vel chiah an LIVE telecast thei dawn. Hei vang hian match pawimawh bik a nih loh chuan kaithar Aizawl FC Home match chu Ten Sports hian an LIVE Telecast tam dawn loh tih a chiang nghal a ni.

I-League hian a hlutna nasa takin a hloh chho mek a. Football club hlawhtling taka enkawl tur chuan sum leh pai tam tak neih leh sen a ngai a, sumdawng leh milian ten Football club-ah an sum an sen (invest) ngam a ngai a. Tun dinhmunah chuan I-League hi mi hausa ten sum sen (invest) nan a langsar tawk lo niin an hria. Sum hmuh letin sum hmanchhuah a phuhruk zawh miau loh chuan club tan kal zui zel a harsa a ni.

Tun dinhmunah hian Aizawl Football Club hian an owner leh club president Pu Robert Romawia Royte firm NECS chauh hi sponsor-tu a nei a, Aizawl FC in ni 5, January 2016 a press conference an neihah co-sponsor leh local-sponsor nei turin an inhawn thu an sawi. Club hlun Pune FC te leh season liamta lama I-League-a in hlangkai Bharat FC leh Royal Wahingdoh te an tel zui theih tawh lohna I-League-ah hian inhlangkai hmasa ber Aizawl FC dinhmun zel tur hi ala ngaihnawm dawn chauh a ni.

An season hmasa bera khel tha em em Meghalaya club Royal Wahingdoh hi pathumna niin season an khar a, hun engemaw chen an inngaihtuah hnuin nikum November thla khan inhnukdawk turin thutlukna an siam ta a ni. Kum 2007-a Shillong Premier League third division atanga bul tan niin, Royal Wahingdoh hian kum 8 a lo vei meuh chuan Indian football-ah sang takah an invawrh tawh.

Aizawla AR Lammualah ngei I-League club ni thei turin an in hlangkai a, hmuh har em em AIFF I-League club licence pawh an sual chhuak hman a ni. Fans nei tha tak Royal Wahingdoh hian an home match apiangah a hmuna inkhel entu mi 10,000 vel nei ziah ang an ni a, an player 11 zel zinga 8 hi chu an state chhulchhuak an ni bawk a ni.

Indian Super League tan a nih pawh khan, Royal Wahingdoh hian player thawh tur enge maw zat an nei hman a, chung zingah chuan Mizo players Lalchhawnkima (Atletico de Kolkata) leh Sena Ralte (Chennaiyin FC) tepawh an tel nghe nghe. Club hlawhtling tak ni chho zel tur anga an lan laiin November ni 19, 2015 khan I-League atanga an ban thu hriat a ni ta si a. Hei hian zawhna tam tak a siam lo thei lo a, I-League club nih a harsat em em laia I-League club ni mek an bang ta mai hian AIFF buaina a rawn pholang a ni.

I-League buaina sawi apianga sawi lan loh theih ta lo chu Hero Indian Super League (ISL) ni 12, October 2014 a kick-off kha a ni a. I-League ang lo takin ISL hian mipui lawm a hlawh em em a, India rama sports channel lar ber ber ten ISL match hi an chhuah vek a. Hero ISL hi IMG-Reliance leh Star India-te nen an thawk ho a, AIFF in a hriatpui bawk a ni. India rama mi hausa leh milar tam takin an sum sen nan an ui lova, hei hian I-League hlutna nasa takin a tihniam bawk a ni.

Indian Super League hian India ramah Football tan rah tha a chhuah nge chhuah lo tih erawh tun dinhmunah chuan sawi a la har khawp mai. Hetih lai hian Event huaihawtah chuan I-League in a phak lo tih chu tlang hriat a ni a, I-League hi India rama Top League a ni a, hei hian India Football hma a sawn pui thei lo nia ngaiin mi thahnemngai ten ISL an buatsaih ta kha ni berin a lang. ISL leh I-League thlunzawmte kha sawi a awm tawh thin a, mahse India club hlunte hian engtik lai mahin an duh ngai dawn lo tih erawh thil chiang a ni.

Engpawh nise India hian theih tawpa Football tih hmasawn a tum mek a, tunah hian rahbi thar kai turin a intham ru mek niin a lang. Chutah chuan Mizoram chuan dinhmun pawimawh kan chang chho zel bawk a, player tha tak tak Mizoram atangin an la rawn chhuak zel dawn a, Aizawl FC hmangin Mizoram Football chanchin tun aia nasa zawkin kan pholang thei dawn bawk a, kumin chu Football lama kan kum that kum ni leh ngei se a lawmawm khawp ang.

Copyright © inkhel.com 2024. All rights reserved.