Mizoram Premier League Round 6-an chu khelh tan a ni ta a, match hmasa berah Aizawl FC chuan si thum faiin Dinthar FC an hneh. Aizawl FC tan hian Kareem Omolaja Nurain , Jonathan Lalrawngbawla leh H. Lalmuankima ten goal an khung. K. Lalthathanga chu man of the match-a thlan a ni.

I League Champion Aizawl FC hian Portuguese coach Paulo Menezes hnuaiah match ruk khel tawhin vawi thum draw an nei a, vawi khat chak loin; vawi hnih an chak a, khelh 6 atangin point 9 an hlawhchhuak a, table-ah pathumna an ni mek.

Aizawl FC 3-0 Dinthar FC

(Kareem Omolaja Nurain 38', Jonathan Lalrawngbawla 39', H Lalmuankima 90')

Aizawl FC XI : Lalawmpuia, Lalhriatrenga, Alfred, Hmingthanmawia, Jonathan Lalrawngbawka, Rochhawrzela, Lalrinzuala Khiangte, David Lalrinmuana, K. Lalthathanga, S Malsawmtluanga, Kareem Omolaja Nurain

Dinthar FC XI : Malsawmdawngzela, Lalbiakzuala, Malsawma Chhangte, Lalnunpuia, R. Lalthantluanga, Lalbiakhlua, Lalbiaknia Pautu, C. Laldinmawia, Lalramliana, David Lalrinchhana, Jackson Victor Ogheneochuko

MPL Champion hmasa ber Dinthar FC hian match ruk khel tawhin vawi thum an tlawm a, vawi hnih an khingpui an inhnehtawkpui a, vawi khat an khingpui an hneh bawk, khelh 6 atangin point 5 an nei mek a ni.

First half-ah goal hnih a lut a, 38 mins-ah Rochharzela corner pet tha zet chu box chhunga awm Aizawl FC defender Kareem Omolaja Nurain chuan a tauh goal, si khat faiin Aizawl FC chaun hma an hruai, he goal a luh atanga minute khatna lekah Aizawl FC hian Janathan Lalrawngbawla hmangin goal an khung chhunzawm.

S Malsawmtluanga ball pek tha zet chu forward Jonathan-a chuan box-ah la lutin an goal hnihna a khung a, half time a nih chuan si hnih faiin Aizawl FC hian hma an hruai der tawh. First half-ah hian Aizawl FC hian goal dang khungna chance pawh an nei a, Rochharzela ball vawrh tha tak chu Alfred-a chuan goal-ah a chantir teuh hle a, Rinzuala shot tha tak pawh Dinthar FC goalkeeper Malsawmdawngzela chuan a lo dang bawk a ni.

Chhumzingin inkhel a tibuai, chawlh lailawk neih a ni, second half tan leh atangin Aizawl FC chuan Mka leh William-a an luhtir, anni hian an attacking an ti na sauh a, Dinthar FC an tang thei tawh lo, goal hnih chu rulh theih tawh loh niin an ngai ni tur a ni, hun tawp dawn tak takah bench atanga lut H. Lalmuankima chuan Aizawl FC goal thumna a khung a, si thum faiin hnehna an chang ta a ni.

Aizawl FC hian October ni 3, Thawhlehni zan dar 7:30-ah Bethlehem Vengthlang FC an hmachhawn leh ang a, Dinthar FC hian October ni 4, Nialini tlai dar 3:00-ah Chanmari West FC an hmachhawn ang.

Reporter : PC Lala