Aizawl FC-in Serchhip khelmualah Bethlehem Vengthlang FC an hneh

12th October 2018, 11:10PM

October ni 12, Zirtawpni khan Serchhip khelmualah Mc Dowell's No 1 Soda Mizoram Premier League (MPL) Season 7 round 7 khelh a ni a, match hmasa berah I League club Aizawl FC chuan 4-1 in Bethlehem Vengthlang FC an hneh. He inkhelah hian Aizawl FC winger Lalrinfela chu Man of the match-ah thlan a ni.

First half-ah Aizawl FC tan F. Lalremsanga leh Ghanefo Ansumana Kromah chuan khat ve ve an khung a, second hlaf-ah Chawnpui FC tan PC Vanlalhruaia chuan goal khat khung a, Aizawl tan bawk Lalkhawpuimawia chuan goal khat a khung bawk.

Aizawl FC hian foreigner midfielder Alfred Kemah Jaryan bak an chhawr theih loh hnuah Liberian striker Ansumana Kromah chu Serchhip khelmualah an chhawr a, hnehna an chang nghal. An match hnuhnung berah chak zawk awmlo in Chawnpui FC 2-2 in draw mahse, I League Club hian semifinal khel turin theihna an neih an lan tir. Khelh tawhah point 12 neiin pathumna an hauh rih a ni.

Bethlehem Vengthlang FC hian an match hnuhnung berah an player thar midfielder Vanlalchhuanpuia leh forward Lalmuanzova chhawr nghalin Ramhlun North FC nen chak zawk awmlo in 2-2 in an inhneh tawk a, Serchhip khelmualah Vanlalchhuanpuia leh Lalmuanzova ten inkhel bul tan leh mahse I League Club Aizawl FC hmaah an tlawm. Khelh tawh point 2 neiin table-ah pasarihna an ni mek.

11:30 AM Bethlehem Vengthlang FC 1-4 Aizawl FC

(PC Vanlalhruaia 49') (F. Lalremsanga 9', Ansumana Kromah 43', Lalrinfela 55', LalKhawpuimawia 90+1')

MoM: Lalrinfela, Aizawl FC

Inkhel tan a tang a minute 9-na lekah Aizawl FC chuan goal an khung nghal a, he goal hi mual veilam sir a tang a Lalbiakzuala ball pek tha zet chu box chhunga awm F. Lalremsanga chuan cool takin goal-ah a chantir.

Aizawl FC chuan inkhel thunnun chhunzawmin Paul Ramfangzaua chuan freekick atangin goal a thun teuh hle a, a goal ngei dawn nia a lan laiin Bethlehem Vengthlang FC keeper Eddie-a chuan a dang hman hram. Isak Vanlalruatfela chuan goal thunna hun tha vawi hnih neiin a goal shot tha zet chu Bethlehem Vengthlang FC keeper Eddie-a chuan an dan sak bawk.

Bethlehem Vengthlang FC pawhin goal thunna hun tha nei ve bawkin T. Shalomlala chuan a hun tha neih a hloh a, bech a tang a lut H. Lalhlimpuia chuan freekick atangin goal a thun teuh hle a, Aizawl FC keeper Lalremruata (Arema) chuan a dang hram.

Huntawp dawnah minute 2 ala awmin Aizawl FC chuan penalty an hlawh chhuak. He penalty hi F. Lalremsanga'n a hlawh chhuak a, Liberian striker Ansumana Kromah chuan goal-ah chantirin Aizawl FC chuan 2-0 a hmahruaiin chawlh lawk an hmang zui ta a ni.

Second half tan a tang a minute 4-na lekah Bethlehem Vengthlang FC tan attacking third a tang a PC Vanlalhruaia goal shot chu Aizawl FC keeper Lalrwmruata (Arema) dinglam sir kilah mawitak a kual lutin an goal khatna a khung.

Aizawl FC chuan huntawp dawn injury time-ah mual veilam sir a tang a Lalrinfela ball pek tha zet chu box chhunga awm Khawpuimawia chuan chiang zetin a pet goal zui a, Aizawl FC chuan 4-1 in hnehna an chang ta a ni.

(adsbygoogle = window.adsbygoogle || []).push({});
Copyright © inkhel.com 2024. All rights reserved.