Real Kashmir chuan Aizawl FC chu 1-0 in an lo hneh a, Real hian vawi 6 khelhah point 10 hmuin palinaah an awm theih phah a ni.

Nilainia I-League game khelh dawn hian Real Kashmir coach David Robertson chuan Aaron Katebe chu a khelhtir lo a, a aiah hian an lak thar Abed Kofi Tetteh chu a luhtir a, player thar hi tlar hma lama hun hmang turin a dah a ni.

Gift Raikhan chuan tlar hnung lamah Kareem Nurain chu a chhawr thei a, Kareem Nurain hian fitness test a paltlang tlai hle a ni.

TRC Turf Stadium-a inkhel an tan phat atangin team pahnihte hi an innawr na nghal viau a, goal thun hmasa zawk nih an tum hle a. A thlengtu lampang hian hun tha an nei hmasa a, Nagen Tamang chuan a sir lam atangin Aizawl box ah chuan ball a vawrh phei a, hei hi Surchandra Singh chuan goal sirah a lo pet hlauh a, hma an hruai theih loh phah a ni.

Real Kashmir hian mikhual team hneh ngei an tum bawk a, minute 31-ah goal an thun ta nge nge a. Corner an hlawh a, hei hi Surchandra Singh chuan petin Bazie Armand chuan Aizawl FC goal-ah a lo tauh lut a. Gurpreet Chahal chuan ball hi a lo dang thei ta lo a, Paul Ramfangzauva pawh a zuan fuh chiah loh avangin Armand chu a dang thei ta lo a, Kashmir chuan 1-0 in hma an hruai phah a.

Aizawl FC chuan si an phurh hnuah goal thun ve ngei tumin theihtawp an chhuah chho a, mahse goal an thun thei tlat lo a ni. Mason Robertson leh Loveday Okechukwu te chuan Leonce Dodoz leh Ansumana Kromah te chu an dang chat zel mai a, anni pahnih zarah Real Kashmir chu an him thei tiin a sawi theih hial a ni.

Second half an khel leh a, Aizawl FC chuan goal thun theihna hun tha chu an nei nual a, mahse an tum chu an tihlawhtling thei ta chuang lo a, Gift Raikhan chuan thlak kual mahse awmzia a nei tam lo hle.

Minute 86-ah Kromah chuan Bilal a bum tawh a, goal ruaka thun chauh hmabak a nih tawh laiin a balance a hloh a, crossbar chungah a pet ta luah a, Aizawl si phurh sut theihna hun duhawm tak a neih chu a hmang tangkai thei ta lo.

Hun tawp thlengin goal dang a luh belh ta lo a, Real Kashmir chu 1-0 in an chak a. December 11 hian Aizawl FC chuan Shillong Lajong an mikhual leh ang a, Aizawl FC chuan Goa lam an pan ang a, Churchill Brothers nen an inhmachhawn ve thung ang.