30 Oct 2018 10:57

inkhel

​Aizawl FC-in Ramhlun North FC an hneh

October ni 30, Thawhlehni tlai Mc Dowell's No 1 Soda Mizoram Premier League (MPL) Season 7 Round 10 match hmasa ber I League club Aizawl FC leh Ramhlun North FC inkhelah Aizawl FC chuan 4-0 a Ramhlun North FC hnehin point thum an hlawh chhuak. He inkhelah hian Aizawl FC winger Albert Zohmingmawia chu Man of the match-ah thlan a ni.

Team pahnih te hi round 5-ah inhmachhawn tawhin Aizawl FC hian 2-0 in anhneh a, an intawn vawihnihnaah Aizawl FC bawk chungnung zawkah an tang leh ta a ni. Aizawl FC hian October ni 28, Pathianni zan khan I League match hmasa ber Shilong Lajong 2-1 a hneh lo in Aizawl an rawn thleng chiah a, team kimin training nei thei lo mahse foreigner an lak midfielder Alfred Kemah Jaryan leh Bektur Talgat Ulluu bakah defender Govin Singh ten bul an tan a, hnehna changin semifinal khelh beiseina an nei sang hle. Ramhlun North FC erawh hunawl an nei tha hle. Mahse, hrem avangin foreigner Waheed Adekunle chu an chhawr thei lo. Midfielder Bamba Musah erawh an chhawr a, hnehna an chang zo lo.

Aizawl FC 4-0 Ramhlun North FC

(Albert Zohmingmawia 31', Rochharzela 48', Lalhriatrenga 54', Lalruatfela 82')

MoM: Albert Zohmingmawia, Aizawl FC

Aizawl FC tan first half-ah Albert Zohmingmawia chuan goal khat a khung a, Second half-ah Rochharzela, Lalhriatrenga leh Lalruatfela ten goal khat theuh an khung bawk. Khelh tawhah point 19 neiin pahnihna an hauh mek a ni.

Inkhel tan a ni a, Aizawl FC chuan inkhel thunun nghalin goal thunna hun tha an nei nghal a, mual dinglam sir a tang a Khawpuimawia ball vawr luh box pawn chiah a tang a Lalruatfela (Fela Zotea) shot tha zet chu a goal dawn nia a lan laiin Ramhlun North FC keeper Eddie Zorammawia veilam sirah a kal. Ramhlun North FC pawhin goal thunna hun tha neiin Lalremruata shot tha zet chu Aizawl FC keeper Lalawmpuia (Awpa) chuan a dan sak hnuah goal sirah chiah a pet leh bawk.

Aizawl FC chuan minute 31-ah an huntha neih hmang tangkaiin Rochharzela ball pek fing zet chu box pawn hret atangin Albert Zohmingmawia chuan an hmahruaina a tan mawi takin a pet goal. First half huntawp dawnah Aizawl FC tan Khawpuimawia chuan goal thun belhna hun tha a neih chu a hloh a, Aizawl FC chuan 1-0 a hmahruaiin chawlhlawk an hmang.

Second half tan a ni a, minute 6 chhungin goal hnih a lut zui leh a, Aizawl FC tan mual dinglam sir a tang a Albert Zohmingmawia ball vawrh luh chu box chhunga awm Rochharzela chuan chiang zetin an goal hnihna a khung hnuah Lalruatfela (Fela Zote) freekick tha zet chu Lalhriatrenga (Achi-a) chuan an goal tumna a tan a khung leh bawk.

Minute 57-ah Aizawl FC tan Khawpuimawia'n penalty a hlawh chhuah chu Ramhlun North FC keeper Eddie Zorammawia chuan a dan sak. Ramhlun North FC chuan goal thun ngei tumin counter attack-in nawr mahse, goal an thun mai thei lo a,  Aizawl FC chuan 3-0 in hnehna an chang dawn emaw tih hnu huntawp dawn minute 82-ah Aizawl FC tan Lalruatfela chuan an goal li na a khung leh a, Aizawl FC chuan 4-0 in hnehna an chang zui ta a ni.

(adsbygoogle = window.adsbygoogle || []).push({});